World Championship khelh duh Srikanth
Rio Olympics quarterfinalist Kidambi Srikanth chuan kumin August thla a neih tur World Championship-ah India tan medal lak a chak thu a sawi a, inelna liana hlawhtling turin March 28 aṭanga Delhi-a khelh ṭan tur India Open-ah nomawi chawi hmasak a duh thu a sawi tel bawk.
Kum 24-a upa Srikanth hi a ke rek na vangin a buai fo a, tun hnaiah erawh a hliam a dam tawh. World Championship khelh hma hian India Open, Malaysia Open leh Singapore Open-ah te inlan a tum.
World number 31 Srikanth chuan, "Thla li chhung zet hliam vanga inkhelh mumal theih loh kha a hrehawm hle, world ranking-ah pawh ka tlahniam. Tunah chuan ka hliam a dam tawh a, a sang zual zingah tel leh theih ngei ka inbeisei. World Championship khelh hmain inelna lian pathumah tal inlan ka tum," tiin a sawi.
Indian shuttler chuan sawi chhunzawmin, "India Open-ah hian world number 4 Viktor Axelsen nen inhmachhawn thei dinhmunah kan ding tih ka hria, a lakah hian vawi thum ka chak lo tawh a, ṭum khat ka hneh tawh thung - tun ṭumah chuan result ṭha ka neih ka beisei," a ti.