Liverpool-in Bayern dawrna an hnar; Mane thlak tur an zawng

Nipui transfer boruak a ngaihnawm zel - a bik takin Liverpool-ah player langsar chhuah duh thawm a ring a, tuna thawm ring ber chu Sadio Mane a ni.

Senegalese forward hian Reds-ah kum khat dang cham turin contract la nei mah se contract hman zawh a tum lo a, Bayern Munich chuan lakluh tumin Liverpool hi vawi hnih an dawr tawh.

Mahse, Merseyside club hian Bayern dawrna an la hnar ve ve - an dawrna hnuhnung zawk hi pound maktaduai 30 thlenga sang chho thei a ni a, mahse, Liverpool hian £42mtd aia tlawma hralh an tum lo.

Hetihlai hian Liverpool hian Benfica striker Darwin Núñez chu Mane thlak nan an ngaihven ve zui nghal a, Japanese forward Takumi Minamino chu a chhuah an phalsak bawk.

Nuihzatthlak
Bayern chuan kar hmasa khan Mane lakluh tumin Liverpool an lo dawr tawh a, mahse, £21mtd pek phawt a, a khelh ṭhat dan a zira £25mtd thlenga tihsan turin an dawr - Reds hian ngaihtuahna seng buai loin an lo hnar nghal.

German club an ngawi duh mai bik lo. Liverpool an dawr nawn a, mahse, an dawr nawnna hian Reds nuih a ti za tlat - £23.5mtd pek phawt a, £30mtd thlenga sang thei turin Bayern hian an dawr.

Bayern-in Liverpool an dawrna hi a tlem a ni satliah lo a, a khelh ṭhat dan a zira an pawisa pek belh tura an 'clause' hian Liverpool ngeng a chhun.

German champion hian Mane hi kum thum chhung contract ziahpui an tum a, £23.5mtd bak an pek belh turah hian, "Kum thum chhung, kum tin Ballon d’Or a dawn chuan," tih leh "Champions League-a Bayern an champion chuan," tih a tel!

Haw phawt ru!
Liverpool tan Bayern dawrna hi nuihzatthlak a ni a, German club hian £42.8mtd an pe tla nghal dawn a nih loh chuan Mane hi hralh an tum lo - kum khat dang chelh a, a hnua a thlawna chhuahtir pawh an pawi ti lo zawk.

Bayern hian an striker chhuanvawr Robert Lewandowski chu an chân ngei dawn niin a lang a, Polish striker hian Barcelona pan a duh thu ualau takin a sawi tawh - a man atan £40mtd tal an phut.

German club-in kum 30 mi Mane aia kum thuma upa zawk Lewy man an chhiar zat leh, Liverpool forward an dawrna enin Bundesliga club chet dan hi dem loh a harsa a, Liverpool-in an lo hnar hi a awm lo hran lo.

Mane hian Liverpool-ah kum ruk hun a hman chhungin match 269-ah goal 120 ngawt a khungsak a, assist vawi 48 a nei bawk. Reds hi Premier League, FA Cup, League Cup, Champions League, UEFA Super Cup leh FIFA Club World Cup-ah vawi khat ṭheuh a champion pui bawk.

Nunez beiseina
Liverpool-in Mane chelh tum aiin a man zat bituk mai chu thutlukna fingah an ngai a, hemi rual hian Mane hmun ruak luah tur player an zawng tel nghal - Darwin Núñez chu hming ri ring ber a ni.

Reds hian Champions League quarterfinal-ah khan Benfica an tawng a, Portuguese club tana khel Nunez hian match hnihah goal a khung ve ve. Liverpool coach Jurgen Klopp-a mit a tlung a, German coach hian lakluh ngei a duh.

Liverpool hian official takin Benfica la dawr lo mah se Portuguese club hian £85mtd aia tlawma hralh an tum lo nia sawi a ni a, Reds hian heti zata an lei a nih chuan kum 2018-a Southampton aṭanga Virgil van Dijk an leina £75mtd a khum dawn tihna a ni.

Kum 22 mi striker hian season hman zawh takah khan Benfica tan inelna hrang hrangah match 41 khelin goal 34 ngawt a khung a, assist vawi li a nei - a goal khung zinga goal ruk chu Champions League lama a khung niin European football-ah pawh a tlangnel hle.

Duhtu dang
Reds hian Nunez hi a tlan chakna, tharum ngahna leh thatho rengna chu an duh chhan pakhat a ni a, Liverpool khelh dan leh Uruguayan striker khelh dan chu a inmil sa thlapah an ngai.

Mahse, Liverpool hian kal dan phung nghet an nei - uchuak takin player hlawh an pun ngai lo a, player hralhna aṭanga sum an hmu ṭha a nih ngawt loh chuan man to uchuak takin player an lei ngai lo bawk.

Tun dinhmunah Nunez hi Atletico Madrid leh Manchester United pawhin lakluh an duh a, a bik takin Erik ten Hag hnuaia insiamṭhat tum Red Devils hian an ngam huai viauin a rinawm.

Hetihlai hian Liverpool chuan club pathumin an inchuh avanga Nunez-a man hi a to uchuak dawn a nih chuan lei loh pawh an hnial lo zawk nia sawi a ni a, Kop ho tana thu hriat nuam tur erawh Nunez hian Anfield-a kal a duh.

Mangṭha Taki
Season hman zawh taka FA Cup leh League Cup-a Liverpool champion theih chhan langsar tak chu Takumi Minamino a ni a, Japanese forward hi FA Cup-ah goal thum khungin Reds tan top scorer a ni.

League Cup lamah pawh Taki hian goal li khungin Reds player zingah ani aia khung hnem an awm lo a, assist vawi khat a nei bawk - season hman zawh takah khan inelna hrang hrangah match 24 khelin goal 10 a khung.

Mahse, Liverpool chuan kum 27 mi forward hi chhuahtir an pawi ti lo a, Red Bull Salzburg aṭanga European football-a hmelhriat hlawh forward hi £17mtd an chhiar a, a chhuah ngei a rinawm.

Minamino hi Leeds United, Wolverhampton Wanderers, Fulham, Southampton leh AS Monaco ten lakluh an duh vek a, he thu buatsaih lai hian khawi club ber nge a zawm dawn a la sawi theih loh.

Khawi ber nge?
Japan tan vawi 40 inlana goal 17 khung tawh Taki hian season hmasa khan Southampton-ah loan-in hun a hmang a, match 10-ah goal hnih a khung.

Leeds boss Jesse Marsch nen hian RB Salzburg lamah an lo thawk dun tawh bawk a, a tlangnelna sa Saints emaw Leeds lam hi a pan mai a rinawm ber - transfer bazar lai a ni miau a, thil erawh danglam thei reng a ni.

Liverpool hian striker Divock Origi contract an pawtsei tawh lo a, Belgian stiker Origi hi AC Milan pan tura ngaih a ni. Nimin khan goalkeeper Loris Karius, winger Sheyi Ojo leh midfielder Ben Woodburn chu nimin khan an chhuah zalen thu an puang bawk.

Hetihlai hian Mohamed Salah chu contract thar chungchangah an la inrempui thei lo a, Reds hian tun nipui transfer zet chu buai takin hun an hmang dawn tih a chiang e!