Real-ah Modric a nghet, Tchouaméni a lut hnai

Luka Modric chuan Real Madrid-ah kum khat atan contract a pawtsei a, kum 36 mi midfielder hi season liam taa La Liga leh Champions League nomawi an chawi theih nan player pawimawh a ni.

Real president Florentino Pérez chuan Modric hi contract a ziahpui zawhah 2023 chuanna jersey nen a pho chhuak. Croatian midfielder hian kum 2012 khan Tottenham aṭangin Real hi a zawm a, Spanish club tan match 436 khelin Champions League vawi nga bakah La Liga nomawi vawi thum a chawipui tawh.

Real coach Carlo Ancelotti chuan, "Modric hian Real Madrid-ah a hun tawp a hmang dawn. A hun tur chu ka hre lo a, mah se hei hi mi zawng zawng duh dan a ni. Club thuneitute tan contract pawhsei hi thil harsa a ni lo," tiin a sawi.

Modric hi Casemiro leh Toni Kroos te nen Ancelotti hnuaiah an inkawp rem a, Rennes aṭanga an lakluh Eduardo Camavinga pawh season khatnaah aṭangkai hle. Los Blancos hian nakin hun thlirin squad an thuam ṭha a, kum 22 mi Aurélien Tchouaméni chu Monaco aṭangin an lalut hnai.

Transfer lama journalist rintlak Fabrizio Romano chuan, "Real Madrid leh Monaco ten inremna an nei tawh. Tchouaméni hian medical test neih a la ngai a, June 13, Thawhlehni zana France leh Croatia inkhelh zawhah an tifel ang. Mimal contract tur pawh peihfel vek tawh a ni," tiin a sawi.

French midfielder Tchouaméni hi Bordeaux aṭanga inzir chhuak niin Monaco-ah hming a chher a, season hnuhnung pahnih league match-ah vawi 35 a khel tling ve ve. France tan pawh nikum August thla aṭang khan khel ṭanin vawi 10 a inlan tawh a, kum tawpa neih tur FIFA World Cup-ah pawh inlan pha ngei tura ngaih a ni.