Valencia manager thar Gattuso

Spanish club Valencia chuan manager atan Gennaro Gattuso an lalut a, Italian manager hi kum hnih atan contract an ziahpui. Kum 44 mi Gattuso hian May 2021 khan Napoli a chhuahsan a, hemi hnu hian club enkawl a la nei leh lo.

Italy international hlui Gattuso hi Napoli a chhuahsan aṭanga darkar 48 pawh tling loah Fiorentina-in manager atan an lalut a, mah se kar thum hnu lekah an inṭhen. Gatusso hian Napoli a enkawl hma hian AC Milan pawh a lo enkawl tawh a, amaherawhchu Napoli a enkawl laia Copa Italia 2019-2020 nomawi an chawi bak nomawi a la chawi lo.

Gattuso hian coach angin sulhnu nei ṭha tawk lo mah se a inkhelh hun laiin player langsar a ni pha a, khelmual chhunga kawlhsen zinga mi a ni. Milan midfielder hlui hian Serie A leh Champions League vawi hnih a chawi tawh a, FIFA World Cup thlengin a champion tawh a ni.

Valencia hi La Liga-ah vawi ruk an champion tawh a, season liam ta khan pakuanaah an awm. Result ṭhat tawk loh avangin manager Javi Gracia chu May 3 khan an ban a, hemi hnu hian Spanish manager Voro chu team enkawl lailawktu niin season tawp lam match thum a kaihruai a ni.