Warriors aia hriam zawk Celtics

NBA Finals boruak a nung chho hle, team hmuhnawm bik Golden State Warriors meuh pawh an duh ang ngawtin an che thei lo. Nimin zing inkhelah GSW hi Boston Celtics mualah 116-100 in an tlawm.

Best of seven series-ah Boston hian 2-1 in hma an hruai, champion tur chuan match hnih tal an chak a la ngai. Inrinni zing dar 6:30 hian TD Garden-ah game 4 an khel leh ang - Stephen Curry leh a ṭhiante tan pressure a sang dawn.

Celtics an hriam
Inkhel ṭan hmain Boston Celtics manager Ime Udoka-a'n boruak an siam tur thu a sawi. An khelmual TD Garden a nih dawn avanga an phur thu a sawi bawk, a sawi lawk ang ngeiin a tir aṭangin boruak a nung ṭha nghal vet vet hle.

Quarter hmasa berah point 11 zetin an sang fal nghal, quarter hnihna an khelh lai chuan point 25 teh meuha san fal lai pawh an nei. Chawlhlawk hnuah Warriors lamin rawn hnaih deuh mah se, a tawp hun pawimawhah Celtics bawk an chungnung.

Jaylen Brown-a'n point 27 a neih zinga 17 zet chu quarter hmasa berah a nei hman! Jayson Tatum (26 points) leh Marcus Smart (24) te pawhin an hna an tlin, a vawi 18 nan NBA champion nih an tumna kawng an zawh dik rih viau.

Tatum chuan, "Ka ṭhianten ka chungah rinna an nghat ngam, ka shot zawng zawng hlawhtling vek kher lo mah se ka beidawng ngai lo. Game hmasa aia ṭha zawk zelin khelh ka tum, na zual zawka nawr ngei pawh ka duh," tiin a sawi.

GSW fiahna
Golden State Warriors hian NBA champion nih an thiam tih chu a takin kan hmu fo tawh, hlawhtlinna an chan ho kha kan thlir kir a nih chuan inkhel an thunun hneh viau zel - kuminah erawh an beisei angin inkhel an thunun thei lo.

Point 31 neitu Curry chu quarter hnuhnung berah chawlhtir a ni, 3 points a vawm luhna lamah a ke rek vei lam a hliam deuh, na tak erawh niin a lang lo. Point 25 neitu Klay Thompson leh Andrew Wiggins (18 points) te hna thawh chu chak nan a tawk lo a ni.

Warriors manager Steve Kerr chuan, "A dinhmun tur chiang takin ka la sawi thei lo," tiin Steph chungchang a sawi a, an khingpui Celtics chu hnehna chan phu zawk an nih thu a sawi bawk. An inkarah point hnih chauh te awm hman mah se a umphak thei ta lo a ni.

GSW tan chak loh nawn a pawi dawn, game 4 an la lo a nih chuan Celtics lamin series-ah 3-1 in hma an hruai fal dawn. Game 5 khelhna tur Chase Center a ni a, khualmualah chak lo pawh ni se Boston hi game 6 khelh hunah anmahni mualah an champion thei dawn.

NBA Finals
Results & Fixtures
Game 1: Golden State 108 - 120 Boston Celtics
Game 2: Golden State 107 - 88 Boston Celtics
Game 3: Boston Celtics 116 - 100 Golden State
June 11, Inrinni
Game 4: Boston Celtics 06:30 AM Golden State
June 14, Thawhlehni
Game 5: Golden State 06:30 AM Boston Celtics
June 17, Zirtawpni
Game 6: Boston Celtics 06:30 AM Golden State
June 20, Thawhṭanni
Game 7: Golden State 06:30 AM Boston Celtics
(Celtics hian series-ah 2-1 in hma an hruai mek)