Lyon-ah Lacazette a kir

Alexandre Lacazette chuan Arsenal tana a contract a hman zawh hnuah, a club hlui Lyon bawk a zawm fel leh ta. Ligue 1 club tan hian kum thum daih contract a ziak - kum 2025 June thla thleng inremna an ziak tihna a ni.

Arsene Wenger hunlai khan Lacazette hian Arsenal a zawm, pound maktaduai 46.5 man niin, £52.6m thlanga pung chho thei a ni. A hunlai chuan club player man to ber a ni hial. A tira an beisei ang erawh a phak chhunzawm ta chiah lo.

Lyon tan inelna hrang hrangah match 275 aṭanga goal 129 khung thei a ni a, a man a tam hi a mak hran lo. Premier League-ah erawh match 158 aṭangin goal 54 a khung, inelna hrang hrangah match 206 khelin goal 71 a khung.

North London club tan hian FA Cup vawi khat a chawi, 2020 FA Cup an lak theih nan final-ah goal a khung. Nomawi lian tham dang erawh a chawi pui lo. June tla tawp ruala a contract zo tur pawh an pawtsei ta lo.

April thla khan Laca hian a club hlui Lyon a la ngaih thu leh, inzawmna an la neih reng thu a lo sawi tawh. Arsenal manager Mikel Arteta-a'n an chelh dawn tih a sawi thei lo bawk a, tunah chuan club leh player duh dan angin thil a kal fal ta a ni.

Lyon chuan a club academy aṭanga zir chhuak hi lawm takin an lo dawngsawng, "Laca hi kan chhuang a, a lo kir hi kan lawm," tiin thuchhuah an siam. A naupan lai aṭanga hrechiangtu leh a hriat chian an nih avangin an inkawp rem leh nghal ang.

Pierre-Emerick Aubameyang-a captain nihna an hlihsak hnu khan Lacazette hian a dinhmun a luah. Khelmual chhungah pawh rinrawl a ni chho, mahse season tawp lamah Eddie Nketiah chuan a rawn nek chhuak ve leh a ni.

Tawnhriat nei pahnih Auba leh Laca an chhuak a, tunah chuan Arsenal hian tlarhma laia khel turin Nketiah chiah an nei. Nipui bazar lai a ni a, squad ti chak turin striker chu an lei ngei ang. Manchester City aṭanga chhuak duh Gabriel Jesus chu an hel hnaivai ber niin an sawi.