In lamah Nadal a in enkawl

Rafael Nadal chuan a rang thei ang bera tennis khelh leh a duh a, a ke phah hliam a dam leh thuai theih nan tunah hian an chenna inah a inenkawl mek - Wimbledon khelh theih a la beisei zel.

Kum 36 mi Nadal hian na nei chung chuan tournament khelh a zuam tawh lo. Wimbledon hi June 27 aṭanga khelh ṭan tur a nih avangin a dinhmun pawh a chiang lo hle, in enkawl nan kar thum chauh a nei.

Nadal-a thupuangtu chuan, "Rafa chu inah nunphung pangngaiin a awm, ni tum emaw ni li chhung emaw chu a chawl hahdam phawt ang. A hliam enkawl mek a ni reng bawk a, kar thar lamah chuan a dinhmun tur pawh a hriat theih deuh tawh ang.

"Eng tiang chena rei nge enkawl a ngaih dawn tih erawh sawi lawk theih a ni lo, damdawi lam thiamte nen inbiak chhunzawm zel a ni ang," a ti. Nadal hian French Open nomawi a chawi hnu khan Wimbledon khelh a duh thu a lo sawi tawh bawk.

Spanish star hian Grand Slam title 22 a nei tawh a, major tournament champion hnem ber a ni. Vawi 20 champion tawh Roger Federer leh Novak Djokovic te nen an la inel chhunzawm zel ang.