Khatla TBL an chak ta

Mizoram Super League season 7-ah a vawi khat nan Khatla TBL an chak. MSL hmasa pahnih champion hian Nilaini zan khan Mizo hlanga khel Chawnpui chu 89-73 in an hneh a, match hmasa lama an chet fuh tawk lohna an insiamṭha.

Zanin dar 8:00-ah TBL an inlan chhunzawm leh nghal dawn. MSL title pahnih nei tawh hian tun hma lama inelna hautak an neihpui ṭhin Tuikual South an hmachhawn dawn. Phengphehlep insiamṭhat tum hmu duh tan inkhel en ngei a chi ang.

R. Dengṭhuama Indoor Stadium, Mualpuia inkhelah TBL tan Michael Lalliansanga a hmuhnawm. Mizoram team tana khel phak Michael-a hian point 27 a nei a, inkhel pumpuia point nei hnem ber a ni.

Serchhip tlangval Michael-a chuan, "Match hmasa zawkah khan ka khel ṭha tawk lo, a tir lamah tihsual ka nei a, team ṭha laka chet ṭhat leh nghal kha a harsa. Match hnihnaah erawh keimah ka infuih a, theihtawp ka chhuah bawk," tiin a sawi.

TBL hian an match hmasa berah Zarkawt BCA an ngam lo, tunah erawh an zia tak tak an chhuah chho leh dawn ta niin a lang. Arvindar Singh a inkhel pangngai tawh viau, point 18 a nei. Levi Bradley Jr pawh minute 13 chauh la inlan mah se a hmuhnawm dawn tih a hriat.

Chak lo Chawnpui tan erawh 'play in' khelh phak a harsa dawn. Mizo hlanga khel team awmchhun hian theihna chu an nei sang, amaherawhchu boruak sang leh harsa laiah team ṭha dangte aiin an ruh a no deuh ṭhin.