Asian Cup khelh tum India an chak
AFC Asian Cup qualifer third round-a an match hmasa berah India chuan hnehna an chang nghal a, mikhual Cambodia chu harsatna nei loin 2-0 in an hneh.
Blue Tigers tan Sunil Chhetri chuan goal hnih a khung a, kum 37 mi ni tawh mah se Bengaluru striker hian a la tar lo tih khelmualah a pholang leh ta.
India hian June 11 zanah qualifier match an khel lehnghal dawn a, Afghanistan nen an inhmachhawn dawn - June 14 zanah Hong Kong nen an match hnuhnung ber an khel ang.
A goal hma
Salt Lake Stadium-a inkhelah India-in inkhel an thunun nghal a, a tir aṭangin Cambodia an nawr na hle - mikhual team an che hleithei lo a, Blue Tigers an chak ngei dawn niin a lang.
Minute 13-na lekah Liston Colaco chuan ṭha takin ball a lalut a, Cambodian defensive midfielder Boris Kok chuan Indian forward dan dan ṭha bera a hriatin a lo foul - mahse, penalty a chawi phah!
Penalty pet turin Chhetri a lo pen chhuak a, India striker chhuanvawr hian harsatna nei loin goal-ah a chantir - thawm chu ring tak a ni.
A hming Chhetri
India-in goal an khung hnuah pawh Cambodia an nawr chhunzawm a, AC Milan star hlui Keisuke Honda kaihhruaina hnuaia khel mikhual team hi an che hleithei lo.
Chhetri bawk chu player langsar a ni a, a vanneih zan ni se hattrick a siam thei hial ang! India captain hian minute 60-naah chak nemnghehna goal a khung ta nge nge a, Brandon Fernandes siamsak chu a tauh lut.
Major League Soccer club Kansas City Wizards striker hlui Chhetri hian ram tan match 127 khelin goal 82 a khung ta a, football la khel mek zingah Lionel Messi (86 goals) leh Cristiano Ronaldo (86) chiah international football-a goal khung tamah a phak lo.
A la tawp lo
Chhetri-a'n India tan goal hnih a khung leh ta a, AIFF Player of the Year vawi ruk ni thei hian Messi leh Ronaldo te kianga a hming lam rik erawh a ngaihtuah loh thu a sawi.
International football-a goal khung hnem parukna Chhetri chuan, "Heng thil avang hian ka kum a tam ve ta tih zawng ka hriat belh a ni mai. Min hriat kha - heng thil hian ka ngaihtuahna a tibuai ve ngai lo.
"Inkhelh ka chawlhsan hunah chuan dul kiar tak chungin, nangni nen kan ṭhu ho ang a, thil in ho pahin heng thilte chu kan la sawi ang chu," a ti a, record siam lamin a lung a len rih lo.
Lawm a kim lo
India-in goal hnih an khung a, an chhuah lo bawk - mahse, coach Igor Stimac lawm a kim lo a, Croatian coach chuan Chhetri tel loa goal khung zir an mamawh thu a sawi.
Stimac chuan, "Sunil bawk a ni leh ta - midang pawhin khung an tum a, mahse, an thei lo a ni. Liston, Manvir Singh, Udanta Singh, Ashique Kuruniyan leh Sahal Abdul Samad te aṭang hian goal ka beisei.
"Anni ho hian goal khung ṭan an mamawh. Inzir kan ngai a, ka naute hian Sunil tel loa khelh an zir a ngai a ni," a ti - hliam vanga mumala Jeje Lalpekhlua inlan theih loh hnuah Blue Tigers tan Chhetri tih loh chu goal khung thei an awm meuh lo.
A kalphung
AFC Asian Cup 2023 qualification hi FIFA World Cup qualification nen khelh kawp a ni a, World Cup qualifier-a mahni awmna group-a pahnihna ni phak loten Asian Cup qualification third round an khel - tuna India khelh hi third round chu a ni.
Third round-ah hian team 24 chu group parukah, group khatah team pali zel awmin ṭhen hran an ni a, group tina a sang ber leh pahnihna zinga a ti ṭha zual pangate chu Asian Cup khel turin an tling dawn.
India hi group D-ah Hong Kong, Afghanistan leh Cambodia te nen an awm ho a, an group match bik hi India-in a thlen bawk avangin Blue Tigers tan Asian Cup 2023 khelh phak loh chu mualphona tawpkhawk a ni ang.
Honda kha?
Khelmual sirah Keisuke Honda hmuh tur a awm a, fans tam takin mak an ti. Japan tan vawi 98 inlana goal 37 khung thei midfielder hian CSKA Moscow leh AC Milan tan a lo khel tawh ṭhin a, hriat a hlawh hle.
Kum 35 mi midfielder hi tunah chuan Cambodia coach a ni tawh - August 2018 khan Cambodia hi coach ni turin a zawm tawh a, coach-a ruat a nih hian inkhelh a la chawlhsan lo.
Honda hi FIFA hriatpui inkhelah chuan Cambodia ho zel tura beisei a ni a, a assistant Felix Dalmas chuan a awm lohin a ai a lo awh ṭhin a, tunah hian Japanese tho Ryu Hirose nen Cambodia coach an ni dun - nikum December thleng kha chuan Lithuanian club FK Suduva tan a la khel a, tunah erawh club khelhna a nei lo.
India an chesual
Kolkata khawpuia India leh Cambodia inkhelh hmain hnam hla play a ni a, Cambodia hnam hla play turah India hnam hla an play palh - hnam hla play laia Cambodian flag lang chu a hnuah a thim bawk.
He thil thlen hma hian Cambodian FA chu an hnam flag design, AIFF-in an lo buaipui chu an sawi ang taka siam a nih loh avangin an lo lungawi lo tawh a, inelna aṭanga inhnuhdawhah hial Asian Football Confederation leh AIFF an vau a, AFC hian thuchhuah siamin pawi an tih thu an sawi hial!
Football Federation of Cambodia (FFC) hi an thlenna hotel hmun hma leh ei leh inah an lungawi lo bawk a, AIFF chuan thil thleng zawng zawng avanga ngaihdam dilna lehkha an thawn tawh.