Newcastle-in Targett an la nghet

Newcastle United chuan Aston Villa aṭanga an hawh left back Matt Targett chu pound maktaduai 15-in an la nghet a, kum li daih contract an ziahpui.

Kum 26 mi Targett hian January thla khan St James Park hi a pan a, Premier League match 16 khelh sakin match 10-ah hnehna an chang. Magpies hi tla thei dinhmun aṭangin 11-naah an invawrhchho.

Magpies hian Targett hi loan-a hawn manah pound maktaduai hnih an seng tawh a, hemi a nih avang hian Target manah hian pound maktaduai 17 an sengah a ngaih theih.

Villa-in Targett an chhuahtir chhan hi Everton aṭanga Lucas Digne pound maktaduai 25-a an lakluh vang a ni. Newcastle manager Eddie Howe chuan, "Ṭha taka kan khelh theihna kawngah Matt Target hian tha a thawh hlawk hle. Player ṭha tak a ni a, a ngheta kan lalut thei hi ka lawm," tiin a sawi.

Magpies manager Howe hian nipui bazarah forward leh centre back te lak a tum a, Stade de Reims striker Hugo Ekitike an dawr bakah Lille centre-back Sven Botman leh Manchester City defender Nathan Ake te nen sawizawm an ni.