Oranje an tlo; Belgium-in Poland an sawp

Nations League-ah Louis van Gaal-a kaihhruai Netherlands-in match hnih an khelh tawh aṭangin hnehna an chang ve ve a, Oranje hian June 8, Nilaini zan khan Wales 2-1 in an hneh. League A group 4 inkhel dangah Belgium-in Poland 6-1 in an sawp ve bawk.

Van Gaal-a naute
Netherlands-in Euro 2020 last 16-a Czech Republic an hneh loh zawhah Frank de Boer an ban a, Oranje team pawh ṭum hnih ngawt lo enkawl tawhtu manager tawnhriat nei ṭha Van Gaal an lalut.

Barcelona leh Manchester United manager hlui Van Gaal hnuaiah match 11 khel tawhin tlawm an la nei lo a, vawi riat ngawt an chak bawk. Nilaini zana an hmachhawn Wales hi World Cup khel tura inpettling hlim an ni a, an mual Cardiff City Stadium-ah an hneh.

Oranje tan Teun Koop-meiners-a'n minute 50-naah a khung a, Wales-in Rhys Norrington-Davies hmangin injury time-ah an sut. Mahse second 100 hnu lekah Burnley striker Wout Weghorst-a'n chakna goal a tauh lut a, goal khung lawma au Welsh mipuite thawm a reh nghal.

Netherlands head coach Louis van Gaal chuan, "Hun tawp dawna goal kan khungna hmasa ber a ni lo a, a tawpna tur pawh a ni lo. Wales khan chak thei turin phurna an nei a, fak pawh an phu. Mahse ka nauten chance an siam meuh lo a, an goal khung pawh kan tihsual vang chauh a ni. Chutihrualin keini pawhin player theihna sang Frankie de Jong te kan kawl a, Weghorst a goal khung tur a siamsak," tiin a sawi.

Goal ruk!
King Baudouin Stadium, Brussels-ah mikhual Poland tan Robert Lewandowski-a'n minute 28-naah goal hmahruai a khung a, amaherawhchu he goal hi Red Devils chhaih kawltu chauh a ni.

Mualneitu Belgium hian first half vekah Axel Witsel hmangin siphurh an sut a, second half-ah Leandro Trossard-a'n goal hnih khungin Kevin de Bruyne, Leander Dendoncker leh Lois Openda ten goal khat ṭheuh an khung.

June 8, Nilaini
Belgium 6–1 Poland
BEL : Axel Witsel 42'; Kevin De Bruyne 59'; Leandro Trossard 73', 80'; Leander Dendoncker 83'; Lois Openda 90+3
POL : Robert Lewandowski 28'
Wales 1–2 Netherlands
WAL : Rhys Norrington-Davies 90+2'
NET : Teun Koopmeiners 50'; Wout Weghorst 90+4'

June 11, Inrinni
Netherlands 12:15 AM Poland
Wales 12:15 AM Belgium