Asian Cup UAE 2019 Qualifier India tan zaninah fiahna hmasa

Vawiin tlai dar 5:00 hian India chuan Asian Cup UAE 2019 khel tura fiahna hmasa ber an hmachhawn dawn - Myanmar nen Yangon khawpuiah qualifier match an khel ang. Inkhel hi DD Sports-ah live a ni dawn. India hi Asian Cup qualifier atana an inpuahchahna friendly match-a Cambodia hneh zo hlim an ni a, an phur khawp ang.

AFC Asian Cup-ah team 24 an inel dawn a, a thlengtu United Arab Emirates bakah Qatar, South Korea, Japan, Thailand, Saudi Arabia, Australia, Uzbekistan, Syria, Iraq, Iran leh China-te chu Asian Cup 2019 khel tura tling chiang tawh sa an ni.

Kawng a thui
Asian Cup qualification round hi Asian Football Confe­deration chuan FIFA World Cup qualifier atan a pawm nghal avangin a kalkawng a thui a, first round, second round, playoff round leh third round thlengin awm a, a hun laia ranking lama hniam India kalkawng phei chu thui tak a ni.

AFC ranking-a 35 aṭanga 46 chin team 12 ten first round an khel phawt a, AFC hnuaia rank 1 aṭanga 34 erawh second round lut sa an ni thung. India-in first round aṭanga bul ṭanin Nepal chu home & away-ah an hneh avangin second round an inpetkai. Second round-ah hian team 40 awmin group riatah ṭhen an ni a, group pakhatah team panga zel an awm.

Asian Cup kalkawng
Second round-ah group tina hmahruaitu leh pahnihna zinga point hmu sang pali chu FIFA World Cup qualification third round khel turin an inpet kai a, Asian Cup khel turin an tling nghal bawk. Group-a pahnihna zinga point hmu hniam pali, pathumna zawng leh palina zinga point hmu ṭha pali chu Asian Cup qualifier third round-ah an tling a, India chu an awmna group-ah a mawngphah an nih avangin third round hi a la lut nghal chuang lo!

Asian Cup qualifier second round paltlang zo lote tan playoff a la awm cheu a, India chuan Laos chu inkhel pahnih belhkhawmah 7-1 zeta sawpin third round hi an lut ve leh ta a ni. Third round-ah hian team 24 awmin group parukah ṭhen an ni a, group khatah team pali zel awmin home & away-in an inkhel kual vek dawn a ni. Group tina hmahruaitu leh pahnihna te hi Asian Cup khel tur hian an tling dawn. India hi Group A-ah Kyrgyzstan, Myanmar leh Macau te nen an awmho a ni.

Myanmar dinhmun
White Angels tia hminglem an pek Myanmar hi FIFA ranking-ah 172-na an ni mek a, India hi 132-na a ni thung. Mahse, India hi ranking vanga inchhuang thei a ni lo. Thawnthu hlui keulet chuan team pahnih hi vawi 17 an inhmachhawn tawh a, India-in vawi li chiah hnehna changin Myanmar hi vawi 10 zet an chak tawh thung. Vawiin tlaia an inhmachhawnna tur khelmual Thuwanna Stadium-a an intawn hnuhnung ber 2013-ah khan Myanmar hian 1-0 in India hi an lo hneh tawh a, AFC Challenge Cup khelh an tumna chu an lo thamraltir tawh.

India tana theihnghilh thiang lo chu Myanmar hi Gerd Zeise hnuaiah an khel dawn tih hi a ni. German coach hian mite hriat hlawh lo takin Myanmar Under 19-ah coach hna a thawk a, 2014 AFC U-19 Championship-ah semifinal luhpuiin 2015 FIFA U-20 World Cup a khelhpui! Player naupang zawkte laka a hnathawh ropui a chhunzawm theih beiseiin nikum October khan Serbian coach Radojko Avramovic thlak nan lakluh a ni. Singapore a enkawl laia ASEAN Football Federation Coach of the Year ni thei Avramovic thlaktu coach hian a hmanthiam sa rawlthar rual Nanda Kyaw, Aung Thu leh Than Paing te hmangin India hi a lo hmachhawn ang.

Hamara Desh
Inrinni khan India hian an inkhelhna tur hmun Yangon khaw­pui an thleng leh der tawh a, nimin khan an practice session hmasa ber an nei. India coach Stephen Constantine chuan, "Myanmar hi mahni khelmuala inlan tur an nih avangin chak tura rinkai zawk vek an ni a, tun hnaiah an thawkrim em em bawk. Tun hmaa kan intawn tawhna thlirlet phei chuan Myan­mar an chungnung zawk. Mahse, hei erawh kan buaina a ni lo a, kan tana pawimawh ber chu vawiin hun hi a ni," tiin theihtawp an chhuah tur thu a sawi a, Cambodia leh Myanmar boruak a in an avangin Yangon khaw­puiah an buai loh phah thu a sawi.

India squad-ah Mizo pa­thum Jeje Lalpekhlua, Daniel Lalhlimpuia leh Jerry Lalrinzuala te an awm a, Cambodia an hma­­chhawn ṭumin Daniel-a'n inkhel bul ṭanin second half-ah goal khungtu Jeje luhtir a ni a, Bethlehem rawlthar Jerry erawh bench lamah hun a hmang tluan thung. Vawiin inkhelah Mizo rawlthar Daniel leh Jerry ten inkhel bul an ṭan lo a nih pawh Jeje Lalpekhlua chu tlarhmaah ding ngei tura beisei a ni.