NECS Cup-ah champion thar awm dawn

Aizawl DFA buatsaih NECS Cup-ah vawi hnih champion tawh Ramhlun South chu nimin khan Bawngkawn 3-2 a hneh loin an tla. Vawiin chawhnu dar 2:00 hian Chhinga Veng leh Thingsulthliah ten semifinal hnuhnung zawk an khel dawn a, nomawi beisei thei zingah champion an la awm lo - Aizawl district-ah lal thar a piang dawn.

Goal lo maw?

Nimin semifinal hmasa zawkah Ramhlun South-in Vanlalthlamuana hmangin minute 15-naah goal an khung a, minute khat pawh an hum thei lo. Bawngkawn-in Lalṭhakima hmanga an sut hnuah second half-ah Emmanuel Malsawmthara leh Lalnuntluanga te hmangin an khung belh leh bawk.

Inkhelh thiam veng Ramhlun South-in comeback ropui lantir tumin R. Lalthanmawia hmangin minute 80-naah an siphurh an sut. Injury time-ah minute li pek belh a ni a, minute khatnaa Samson Ramengmawia freekick pet chu Bawngkawn keeper MC Lalneihsanga'n a hnek fuh lo a, goal-ah lut ngei mah se pawm a ni lo. Ramhlun South-in an khelh chhunzawm duh lo a, Bawngkawn chu chaka puan an ni.

Match official lamin keeper MC-a lakah Vanlalthlamuana a foul-ah an ngai a, amaherawhchu replay aṭanga thlir chuan MPL club Ramhlun North FC forward Thlamuana lakah Bawngkawn defender a foul zawk niin a lang. Ramhlun South an vanduai a, Bawngkawn lamin tihsual an nei lo a, goal an khung tam zawk avangin an chak a, Chhinga Veng lakah phuba lak theihna remchang an nei bawk.

Team ṭha ber?

Mizoram Premier League club awmna Chhinga Veng hi kumin NECS Cup-ah hian team ṭha ber an nih loh pawhin champion tura rinkai an ni chiang tawh. Coach H. Lalremruata naute hian match ruk an khelh aṭangin goal 35 zet an khung tawh a, clean sheet vawi li neiin an lamah goal hnih chiah a lut. Final lut tawh Bawngkawn 7-0 a sawp thei an ni a, goal 13 khung tawh Vanlal­lawma leh goal kua khung thei Rochharzela te Thingsulthliah lamin an ven uluk a ṭul ang.

Hei le Thingsulthliah

Aizawl khawpui pawn aṭanga inlan zinga thleng sang ber Thingsulthliah hian an match hmasa pahnihah goal chhuah loin Sakawrdai (2-0) leh Tuikual North (4-0) hnehin last 16 an lut. Pre quarterfinal chinah erawh an tlarhnung a phui lo, match li khel leh tawhin goal an chhuah vek.

Thingsulthliah hian an match hnuhnung berah Joel Lalmuanpuia hattrick hmangin Ramhlun North 5-1 in an sawp. MPL5 Under 18 best forward Joel-a hian kum bithliah inelna loah pawh a rintlak tih a lantir tawh a, en liam theih a ni tawh lo.

Chhinga Veng khingpui hian an club defender Lalramfelpuia an paltlang a ngai dawn a, Dinthar FC defender hlui Felpuia hi captain a ni a, tlarhnungah tiphui­tu ni satliah loin team chhunga phurna petu a ni. Vawiin semifinal hi a hmuhnawm dawn a, chak zawk tur engmah a chiang lo.

Inkhel Results
Ramhlun South 2 - 3 Bawngkawn
RAM : Vanlalthlamuana 14';
R. Lalthanmawia 80'
BAW : Lalṭhakima 15'; Emmanuel Malsawmthara 60'; Lalnuntluanga 78'
MoM : H. Lalmuankima, Bawngkawn