Kawng zawh tur lam a hriat dawn Zarkawt Serpents vs Tuikual South
Mizoram Super League Season 3-ah state pawn player chah thleng hmasa pahnih Zarkawt Serpents leh Tuikual South BC ten an match hmasa berah an khingpui an hneh lo ve ve. Zanin dar 7:00 hian club pahnih hi Hawla Indoor Stadium-ah an inhmachhawn dawn. A chak zawkin semifinal kawng an zawh ang a, chak lo zawk chu relegation zone-ah an tawm ang.
Tuikual South centre Palpreet Singh Brar chu inhliam vangin a inlan theih hmel lo a, point 26 nei nghal Amjyot Singh erawh ṭhâl na chungin a inlan luih theih beisei a ni.
Zarkawt Serpents coach Victor Vanlalmawia chuan, "Amjyot ringawt pawh hi ven tham a ni a, kan fimkhur hle a ṭul dawn. Chutihrualin an Mizo player-te pawh hi an ṭha hlawm em em a, hei vang hian mimala inven sen theih a ni lo ang. Chak tur chuan team thawhhona ṭha kan mamawh dawn - inkoh hnem leh inpuih tlan a ngai nasa dawn a ni," tiin Vanglaini palai a hrilh.
TKS match hmasa berah state pawn player an rin luatah Mizo player ṭha F. Zodinthara, Vanchuangpuia leh Lalrohlua te an khel ṭha tawk lo. Season liam taa an inchhuanna an tlarhnung a pawp bawk.
Tuikual South coach KC Lalliantluanga chuan, "Kan tlarhnung kan siam ṭhat a ngai a, freethrow ah hma kan sawn a ngai bawk. Kan player-te an theihna anga an khelh chuan hnehna kan chan theih ka ring," tiin a inringtawk hle.
'Phengphehlep' hian MSL3 ṭan hmain Season Opening Tournament leh MBBA Cup nomawi an chawi tawh a, player an neih ṭhat bawk avangin coach KC-a'n tlak a hlauhthawn loh thu a sawi tel bawk. Zarkawt Serpents hi MSL2-a semifinal lut pha an ni a, amaherawhchu an player neih dan thlirin Tuikual South anga inringtawk tur an ni lo.
Tun ṭumah hian Sahil Sharma leh Kanipi Shiv Kumar te chu season ṭan phat aṭangin chhawr theih turin an awm nghal a. An match hmasa bera Mission Vikings an hneh loh chhan nia lang chu tawnhriat an neih tam tawk loh vang a ni ber a, an vanduai tel ve bawk.
Serpents hian Tuikual South nen an match hmasa bera an tawnhriat hi an hman ṭangkai thiam nghal a ngai dawn a, guard Lalsangkima Ralte a dam tawh avangin phur tharna tur a awmin a lang bawk.
Serpents coach Victor-a chuan, "Chak ngei ngei a ṭul a, tha tawpa kan ṭan a ṭul dawn a ni. Kan tan chuan Zarkawt mipui hi kan chakna hnar a ni a, min ṭawiawm ṭhat leh ngei hi ka beisei tlat a ni," tiin mipui a sawm.
Zarkawt mipuiin coach sawmna an tih hlawhtlin ngei a ṭul - an khingpui tur Tuikual South hi MSL-a ṭantu nei ṭha ber zinga mi an ni a, Hawla Indoor Stadium mawi tham an kalkhawm ziah.
Inelna Thlirna Tawi
ROUND 1
March 21, Thawhlehni
Khatla TBL 69 - 67 Chanmari Hollow BBSP
March 23, Ningani
Tuikual South BC 87 - 89 Zarkawt BCA
March 24, Zirtawpni
Mission Veng Vikings 67 - 66 Zarkawt Serpents
ROUND 2
Zanin Inkhel Tur
7:00PM Zarkawt Serpents Vs Tuikual South BC
March 30, Ningani
7:00PM Chanmari Hollow BBSP Vs Mission Veng Vikings
March 31, Zirtawpni
7:00PM Zarkawt BCA Vs Khatla TBL
Team Dinhmun
# TEAM Pld W L Pts GF GA GD
1 Khatla TBL 1 1 0 2 69 67 2
2 Zarkawt BCA 1 1 0 2 89 87 2
3 Mission Veng Vikings 1 1 0 2 67 66 1
4 Zarkawt Serpents 1 0 1 1 66 67 -1
5 Chanmari Hollows 1 0 1 1 67 69 -2
6 Tuikual South BC 1 0 1 1 87 89 -2