England tan goal nen Defoe a kir

Kum 2013 hnua England tana a inlan hmasak bernaah Jermain Defoe chuan goal a khung nghal - Pathianni zan khan England hian World Cup qualifier-ah Lithuania chu 2-0 in an hneh a, World Cup Russia 2018 khel turin an dinhmun an sawh nghet zel.

England boss Gareth South­gate tan manager nghet dinhmun a luah hnua Wembley-a a match hmasa ber a ni bawk a, a bul ṭan danah a lawm khawp ang. Wembley-ah inkhel ṭan a nih hmain kar hmasaa firfiak ten London khawpui an beihnaa thi mi pali te sunnan ngawi rengin minute khat din a ni a, January-a thi England manager hlui Graham Taylor hriatrengna hun hman a ni bawk.

Chuai thei lo Defoe

Kum 34-a upa a ni tawh a, England tana a inlan hnuhnung ber chu November 2013-a Wembley-a Chile an hmachhawn kha a ni. Mahse, tun season Premier League-ah goal 14 a khung tawh miau avangin manager Gareth Southgate-a'n Defoe a ko a, Sunderland striker hian amah ringtu manager a chhanletna chu goal a ni - Southgate a inchhir lo tawp ang.

Khelmualah minute 21 hun a hmang hman chauh tihin Defoe hian goal hmahruai a khung nghal a, Raheem Sterling hnen aṭanga a ball hmuh chu Lithuania keeper Ernestas Setkus man hman lohin a khung. Defoe-a'n goal hmahruai a khung hma hian Lithuania keeper hian ṭha zetin English striker goal khung tur nia lang hi a dan sak tawh a, a vawi hnihnaah erawh a dang zo tawh lo.

World Cup 2018-ah Eng­land jersey ha chunga inlan a la beisei thu sawitu Defoe hi khelmuala minute 60 hun a hman chhungin a hmuhnawm tluan chhuak zak a, kum 34-a upa a ni tawh tih hi rin a har! Tottenham Hotspur striker hlui hian ram tan match 56 a khelh tawha a goal 20-na a ni a, England tana goal 20 khung tling thei player 22-na a ni.

Defoe thlaktu Vardy

Minute 60-naah England coach Southgate-a'n Defoe lachhuakin Jamie Vardy a luhtir a, Leicester City striker hian goal khung turin minute ruk bak hun a mamawh lo. Claudio Ranieri ban a nih hnua Foxes tana a theihna pholang leh ṭan tawh striker hian Liverpool midfielder Adam Lallana hnen aṭanga a ball hmuh chu hnai set sawt aṭangin a khung a, a goal khung hi a ball khawih hmasak ber a ni!

Goal khung lo mah se England tan Lallana a langsar a, England Player of the Year ni lai hian ram tan a match hnuhnung pangaah goal thum khungin assist vawi khat a nei tawh. England manager Gareth Southgate-a'n a naute khelh danah lawm lohna tur a zawng duh ṭalh a nih chuan an chance neih zat ngaihtuaha an goal khung theih lohna hi a ni ang.

Lithuania an mikhual hmain friendly match-ah Gemany chu khualmualah an hmachhawn a, 3-4-3 formation hmanga khel English player-te an khel ṭha viau nachungin 1-0 in an tlawm - an chance neih goal a an chantir theih loh ṭhin vang a ni. Lithuania lakah erawh 4-2-3-1 hmangin Defoe-a'n mamawh chhanna a ni tih a pho lang a, Harry Kane leh Daniel Sturridge te an dam hunah phei chuan England hi tum an chakawm dawn lo.

Eng nge an sawi?

England manager Gareth Southgate chuan, "Kan hna ṭha takin kan thawk a, kan tihtur kan ti a ni. Ka naute khelh dan erawh uchuak taka fak ka tum hran lo a, a pumpuia thlir erawh chuan kan ruahman ang chiahin kan khel chhuakah ka ngai. Player-ten chak duhna thinlung pu chungin an khel a, vawiin aia ṭha zawk hian kan la khel zel ang," tiin a aia ṭha zawka an khelh tur thu a sawi.

Lithuania boss Edgaras Jan­kaus­kas chuan, "Vawiin thlenga kan team hmachhawn tawha ṭha ber kan tum a, ka naute khelh dan kha ka chhuang a ni. Vawiinah hnehna chang lo mah ila in zir nan kan hmang ang. Kan khingpuiten min nawr dan leh an khelh dan kha kan tan chuan zir tham a ni," tiin an ngam loh England a dah sang hle.