Match 1,000 khelhniah Nadal a tho chhuak

Rafael Nadal-a'n pro­fessional match 1,000 a khelh niah Philipp Kohlschreiber chu 0-6, 6-2, 6-3 a hnehin Miami Open last 16 a in vaw kai.

Pathianni zan inkhelah Nadal a talbuai. Set hmasa berah game khatmah a la lo! Grand Slam vawi 14 champion tawh Nadal hi a mualpho hle dawn niin a lang hman. Mahse, tun hma lama vawi 13 a hneh tawh Kohlschreiber lakah set hnuhnung pahnih la zawnin hnehna a chang.

Kum 30-a upa Nadal chuan, "Match 1,000 khelh theih hi ka tan a hlu, hun rei tak ka inkhel ve ta tih a chiang. Mallorca-a ka match hmasa ber ka khelh ṭum kha ka la theihnghilh lo, ATP hnuaia inelna a hnehna ka channa hmasa ber a nih avangin ka theihnghilh tawh lo ang," a ti.

Spain tlangval Nadal hian quarterfinal lut tur chuan Guido Pella 6-4, 6-3 a hnehtu Nicolas Mahut a paltlang leh a ngai ang. Miami Open final vawi li khel tawh Nadal bakah hian seeded pahnihna Kei Nishikori chuan last 16 a lut ve bawk, Japan star hian inkhel inhnehtawk tak­ah world number 25 Fernando Verdasco chu 7-6 (2), 6-7 (5), 6-1 in a hneh.