FIFA U17 World Cup Guwahati-ah semifinal khel dawn

Nimin khan FIFA leh Local Orga­nising Committee (LOC) te chuan World Cup U17 khelhna tur stadium paruk match chan tur ṭheuh an puang a, slogan atan 'Football takes over' tih chu an thlang bawk.

Kum hnih dana neih khawvel huapa kum 17 hnuai lam tana football inelna lian ber hi October 6-ah khelh ṭan a ni dawn. Inelna hi khawpui paruk Navi Mumbai, New Delhi, Goa, Kochi, Guwahati leh Kolkata ah te neih a ni dawn.

North East khawpui aṭanga FIFA U17 World Cup thleng thei awmchhun Guwahati chuan October 25 khian Indira Gandhi Athletic Stadium-ah semifinal an thleng ang. Guwahati hian group match pathum bakah last 16 leh quarterfinal match khat ve ve a thleng bawk dawn a ni.

Final leh pathumna inchuhna chu Salt Lake Stadium-ah October 28-ah khelh a ni ang a, opening match hi New Delhi leh Navi Mumbai-ah khelh kawp a ni ang. Mumbai hian an stadium Dr DY Patil Stadium-ah hian semifinal pakhat zawk an thleng bawk ang.

Head of FIFA Tournaments Jaime Yarza chuan, "FIFA U17 World Cup hi India rama football-in hma a sawn theih nana mellung pawimawh tak a ni. Match schedule siam tur hian player hriselna, inelna kalphung, team zin dan tur, khaw awm dan leh tehna hrang hrang en a ni. Stadium tin hian match riat tal a thleng vek ang a, khaw tual mipui football tui dan a zirin match hi sem a ni bawk," tiin uluk taka match khelhna tur sem a nih thu a sawi.

Inelna thlengtu India-in khelhna hmun a chang nghal a, Asia ram dang Iran, Iraq, Japan leh North Korea ten qualifier kaltlangin FIFA U17 an khel dawn bawk. Heng bakah hian South America (CONMEBOL) aṭangin Brazil, Paraguay, Chile leh Colombia te an tling tawh a, Oceania Football Confederation (OFC) aṭangin New Caledonia leh New Zealand te an tel chiang tawh bawk.

Hetihlai hian Europe (UEFA), North and Central America and the Caribbean (CONCACAF) leh Africa (CAF) aiawh tur erawh a la chiang lo. FIFA U17 World Cup-ah hian team 24 an tel dawn a, fixtures hi July 7 hian Mumbai-ah pawh a ni ang.