West Bengal an champion

Penalty shootout hmanga Mizoram hnehtu West Bengal-in Santosh Trophy nomawi an chawi.

Pathianni zan khan GMC Bambolim Stadium-ah West Bengal hian extra time tawp hma chiaha Manvir Singh-a goal hmangin inelna thlengtu Goa 1-0 in an hneh.

Final-ah hian mipui 5,000 vel an pungkhawm a, hun pangngaiah goal a lut lo. Extra time-ah West Bengal an vannei a, minute 119-naah Manvir Singh-a'n goal awm chhun a khung.

Coach Mirdul Kanti Banerjee hote hian final round-ah match ruk khelin goal an chhuah an lo a, an tlarhnung phui ṭha hi nomawi an chawina chhan a ni.

West Bengal tana goal khung hnem ber Manvir-a'n goal hnih chiah a khung a, Mizoram nena pe­nalty-a chakna goal khungtu Moirangthem Basanta Singh chu best striker-ah thlan a ni. Bengal keeper Sankar Roy-a'n goal khat mah a chhuah lo a, semifinal-ah Mizoram nen penalty vawi hnih a dang na­chung­in best keeper chawi­­mawina a dawng pha lo.

Santosh Trophy vawi 71-na champion West Bengal hi state leh state inelna sang berah hian vawi 32 an champion-na a ni a, anmahni hnaih bertu Punjab chu vawi riat chiah an la champion avangin an record hi state dang tan ban phak rual a ni lo.

Mimal Lawmman
Best Goalkeeper Bruno Colaco, Goa
Best Defender Provat Lakra, Bengal
Best Midfielder Cajetan Fernandes, Goa
Best Striker Basant Singh, West Bengal