Yamaha tan Vinales a chak nghal
Maverick Vinales chuan Yamaha bike khalh chunga MotoGP intlansiak a hmachhawn hmasak berah hnehna a chang nghal! Pathianni khan MotoGP 2017 season hawnna Qatar Grand Prix tlan a ni a, Spanish rider Vinales hian Andrea Dovizioso lakah 0.461sec in hnehna a chang.
Ruah sur vangin QatarGP hi minute 45 velin a hun sawn tlai a ngai a, lap 22 tlan tur chu lap 20 a tih hniam a ni bawk. Intlansiak ṭan tirh aṭangin rider ho an fimkhur hle. Season hmasa tawp lam aṭanga rawn par vul Vinales-a'n pole position (a hmasa ber) aṭangin bul ṭan mah se rei lote hnuah panganaah a tla thla.
Kum 22-a upa Vinales hian intlansiak hnuhnung lam lap sarih chauh tlan tur a awm tawh tihah a theihna a rawn lantir leh a, vawi hnih chauh tlan kual a ngai tawh tihah chuan a chak dawn tih a chiang der tawh - MotoGP bike a khalh hnua a vawi hnih nan hnehna a chang.
Vinales chuan, "Tlankawng harsa taka hnehna ka chan theih chhan chu bike ka neih ṭhat vang a ni. Intlansiak kan ṭan tirh khan midang kha ka vengthawng lutuk a, na taka min nawr avang khan a tawp lamah erawh keimah chauh inngaihtuah chungin ka theihna zawng zawngin hnehna chan tumin ka bei," a ti, season hmasa Suzuki bike khalh chunga palina ni thei rider hian a bike thar a chhuang hle.
Casey Stoner-a'n Repsol Honda team a zawm hnua MotoGP intlansiak a hmachhawn hmasak ber ṭum, kum 2011 khan hnehna a lo chang nghal tawh, bike intlansiakna lian berah Stoner hnuah Vinales hi a team thar tana hnehna chang leh nghal thei hmasa ber a ni.
Yamaha rider pakhat zawk Valentino Rossi chuan 10-na aṭangin bulṭan mah se palina a ni thei, kum 38-a upa Italian rider hi a kum a tam deuh tawh nachungin rider championship inumah a tel leh phak a nih pawhin a mak lo ang. Champion lai Marc Marquez chu Rossi hnungah thlengin palina a ni ve bawk.
Tun season aṭanga Ducati bike khalhtu Jorge Lorenzo chuan a team thar tana a intlansiak hmasaah 12-na a luah pha hram. Yamaha rider hlui hi lap hmasa berah track sirah a tlan chhuah palh avangin 16-naah a awm phah a, a tawp thlengin a dinhmun a siamṭha zo tawh lo.
Kuminah hian MotoGP intlansiak 18 a awm dawn a, GP pahnihna atan chuan April 9 hian Argentina Grand Prix an tlan ang.
Qatar MotoGP Results
1 Maverick Vinales Spain Yamaha
2 Andrea Dovizioso Italy Ducati
3 Valentino Rossi Italy Yamaha
4 Marc Marquez Spain Honda
5 Dani Pedrosa Spain Honda
6 Aleix Espargaro Spain Aprilia
7 Scott Redding Britain Ducati
8 Jack Miller Australia Honda
9 Alex Rins Spain Suzuki
10 Jonas Folger Germany Yamaha