Germany vawi ngaah vawi nga

FIFA World Cup Qualifier-ah champion lai Germany chuan Pathianni zan khan Baku-ah Azerbaijan 4-1 in an hneh a, world champion hi Group C-ah match nga khel tawhin vawi nga an chak a, hmahruaitu an ni.

Inkhel dangah Northern Ireland-in an mualah Norway 2-0 in an hneh a, point 10 hmuin pahnihnaah an awm. Czech Republic-in khualmualah San Marino chu 6-0 zetin an sawp a, point riat hmuin pathumnaah an awm ve bawk.

German an chungnung

Germany inkhel en duhin ticket an hralh zo vek a, Tofig Ba­khra­mov Stadium khat mipui an pungkhawm. Mikhual hian rin lawk angin inkhel an thunun bawk.

Amaherawhchu, minute 15-na hnuah chauh Germany hian Jonas Hector hmangin Azerbaijan keeper Kamran Agajew tan hna an siam chauh. Minute li hnuah German left back Hector-a cross ball ṭha tak chu Andre Schurrle-a'n a pet goal.

Germany-in inkhel thunun chhunzawm mah se counter attack hmangin Azerbaijan-in an chhu let a, 2. Bundesliga club Erzgebirge Aue striker Dimitri Nasarow chuan minute 31-naah Manuel Neur aia lut Bern Leno dan rual lohin a khung.

He goal hian Azerbaijan point hlawhchhuah pui lo mah se Die Mannschaft-in an ram history-a goal an chhuah lo rei ber record chu minute 678 hnuah tihtawp a ni thung.

Die Mannschaft hian minu­te nga hnuah hma an hruai lehnghal a, Schurrle ball fing tak chu Thomas Muller-a'n harsatna neih loin a khung. First half tawp hma chiahin Joshua Kimmich cross chu Mario Gomez-a'n chiang takin a tauh goal bawk.

Second half-ah inkhel kal­hmang danglam hret mah se Germany keeper Leno-a'n hna a nei meuh lo. Die Mannschaft tan Sami Khedira-a'n chance ṭha a hlah hnuah Schurrle-a'n minute 81-naah goal lina a khung a, 4-1 in world champion an chak.

Muller leh goal 37

Bayern Munich forward Thomas Muller chuan ram tana vawi 85 inlanah goal 37 khungin Oliver Bierhoff khung zat a tluk pha chiah.

Kum 27-a upa Muller hian Mi­chael Ballack (42), Uwe Seeler (43), Karl-Heinz Rummenigge (45), Rudi Voller (47), Jurgen Klinsmann (47), Lukas Podolski (49), Gerd Muller (68) leh Miroslav Klose (71) te chiah a tluk tawh lo.

A ṭha thaw khat

Goal hnih khungtu Andre Schurrle chuan, "Kan thawkrim a, a chang kha chuan muang leh hret ṭhin. A tawpah erawh kan duh ang result hlawhchhuah phu khawpin kan khel ṭha a ni," tiin inkhel chungchang a sawi.

Germany coach Joachim Low chuan, "A pumpuia lak chuan ka lungawi. Chutihrualin kan khelh ho lohna a rei deuh tawh avangin kan tum ṭhenkhat tih hlawhtlin tak loh kan nei ve bawk," tiin an khelh dan chu a ṭhat famkim loh thu a sawi.