Kerber a kal zel

Miami Open khelh mekah seeded pakhatna Angelique Kerber chuan Pathianni zan khan Madison Keys hnehin last 16 a lut, inkhel dangah Simona Halep, Svetlana Kuznetsova leh Venus Williams ten hnehna an chang ve bawk.

Crandon Park-a inkhelah world number 1 Kerber hian a khingpui service vawi nga chhuh sakin 6-4 7-5 in hnehna a chang. German nula hian zanin dar 12:30-ah Japanese star Risa Ozaki a hmachhawn leh ang.

Kum 36-a upa Venus chuan Patricia Maria Tig 6-3, 6-0 in a hneh. Venus hi tun ṭumah hian player upa ber niin Miami Open hi vawi 18 a khelhna a ni a, vawi thum a champion tawh. American star hi Taylor Townsend hnehtu Svetlana Kuznetsova nen an inkhel leh dawn.

Inkhel dangah seeded pathumna Halep chuan Anett Kontaveit lakah 6-3, 6-0 in hnehna a chang. Romanian star Halep hian Samantha Stosur a hmachhawn ve leh thung ang.