Theihtawp chhuah tum Mumbai coach
Mumbai FC coach thar Oscar Bruzon chuan Maharashtra club chu I League-ah an him ngei theihna turin theihtawp an chhuah tur thu a sawi. Mumbai FC hian match 12 chhung ngawt chak ni hmel an hmuh loh hnuah coach Santosh Kashyap an ban a, Royal Wahingdoh boss hlui hmunruak luah tur hian Spanish second division club RCD Mallorca assistant manager hi an lalut ta a ni.
Kum 39-a upa manager chuan, "Ka player-te hian kan ti thei a ni tih inhria se ka duh a, kan match khelh leh hmasak ber tur bak ngaihtuah theih a ni lo bawk. Tunah chuan kan rilru zawng zawng hi Churchill Brothers lamah chauh kan dah rih tur a ni. Player-te hi an rilru lam thlengin an inpeih a ngai a, tactical lamah pawh inthlak a awm nual ang. Players 28 ka nei mek a, team tana player ṭha ber zel ka thlang ang. He team tan huaisen taka bei a, theihtawp chhuahtu hi ka mamawh chu a ni," a ti.
Spanish manager hi Indian football-ah a mikhual lo hle. Sporting Club de Goa-ah season hnih chhung coach dinhmun a lo chelh tawh a, 2012-13 I League-ah parukna nihpuiin 2013-14 ah pangana a nihpui a, a season hnuhnung zawkah hian Federation Cup final a hruai thleng bawk. Kum 2015 khan Indian Super League club Mumbai City-ah Nicolas Anelka thachhang dawltu niin assistant manager a lo ni tawh bawk a, player a nih laia striker niin Celta Vigo tan a khel tawh.