World Cup Qualifier ; Argentina tan dinhmun sawhngheh hun

World champion vawi hnih ni tawh Argentina-in beisei angin 2018 FIFA World Cup Qualifier-ah bul an ṭan ṭha tawk lo. Lionel Messi awmna ram hi tun hnaiah an insiam ṭha leh tawh a, zanin dar 1:30 hian ram 10 inel zinga a hniam ber dawttu Bolivia an lenchilh ang.

Argentina hian man match hnuhnung berah Messi goal khat hmangin Chile an hneh, inkhelh zawhah coach Edgardo Bauza-a'n an team chu mimala innghat an nih loh thu a sawi mah se Bolivia lakah Barcelona star hi player pawimawh ber a ni leh dawn.

Match 13 khelh aṭanga point 22 hmu tawh Argentina hian Bolivia lakah record an nei ṭha. An intawn hnuhnung pasarihah Argetina hian chak loh an nei lo, he tih lai hian Bolivia hian zanina an inkhelhna tur Estadio Hernando Siles-ah hian kum 2009 khan Argentina hi 6-1 in an lo sawp tawh a ni.

Brazil tling dawn?

Tite kahhruaina hnuaiah Brazil-in point sarih zetin Uruguay lakah hma an hruai fal tawh. Nilaini zinga an mikhual Paraguay an hneh a nih chuan Russia pan turin an tling thei tawh. Mahse, Brazil tan chak ringawt a tawk lo, tling chiang tur chuan inkhel dangah Chile leh Ecuador ten point thum an hmuh zawh loh ve ve a ngai.

Brazil hian nikum September thla khan coach Dunga banin Tite an lalut a, kum 55-a upa Tite hian match sarih a kaihhruai tawhah chak loh a nei lo, an chak vek.

An match hnuhnung berah Brazil hian Uruguary 4-1 in an sawp, hemi ṭum hian Dani Alves chu yellow card a hmuh avangin Paraguay a hmachhawn thei dawn lo. Juventus defender aiawh tur hian Sevilla right back Mariano chu koh a ni. Mariano hian tun season-ah La Liga club tan inelna hrang hrangah match 36 khelin assist vawi thum a nei tawh.

Zanin (Nilaini zing) Inkhel Tur
Bolivia 01 : 30 Argentina
Ecuador 02 : 30 Colombia
Chile 03 : 30 Venezuela
Brazil 06 : 15 Paraguay
Peru 07 : 45 Uruguay
Team Dinhmun
Pos Team Pld W D L GF GA GD Pts
1 Brazil 13 9 3 1 32 10 22 30
2 Uruguay 13 7 2 4 25 15 10 23
3 Argentina 13 6 4 3 15 12 3 22
4 Colombia 13 6 3 4 16 15 1 21
5 Ecuador 13 6 2 5 23 18 5 20
6 Chile 13 6 2 5 21 18 3 20
7 Paraguay 13 5 3 5 13 18 -5 18
8 Peru 13 4 3 6 20 22 -2 15
9 Bolivia 13 2 1 10 10 32 -22 7
10 Venezuela 13 1 3 9 16 31 -15 6