Salah aia thiam zawk an awm lo

Liverpool-a contract thar ziak duh rih lo Mohamed Salah-a'n chawimawina a dawn belh leh ta a, Egyptian forward hi PFA players' player of the year-ah thlan a ni.

Kum 29 mi Salah hian season hman zawh takah khan Premier League match 35 khelin goal 23 a khung a, assist vawi 14 a nei bawk - top scorer a nih bakah assist ngah ber a ni.

Manchester City forward Phil Foden chu PFA young player of the year atan thlan a ni a, a zawnin he chawimawina hi a dawng - a nep lo hle.

Hmeichhe lamah Chelsea forward Sam Kerr chu player ṭha berah thlan a ni a, City forward Lauren Hemp chu a zawna a vawi li nan young player of the season-ah thlan a ni bawk.

Egyptian King
Salah tan PFA player of the year chawimawina a vawi hnih dawnna a ni a, 2017-18 season khan Egyptian forward hian he chawimawina hi a lo dawng tawh - a phut zat pawisa hlawhtir loa chhuahtir hi Reds tan chânna a ni dawn.

Wales player ropui Mark Hughes, England legend Alan Shearer, Arsenal fan-te atchilh rawn Thierry Henry, Real Madrid forward hlui Gareth Bale leh City midfielder Kevin de Bruyne te chuan he chawimawina hi vawi hnih ṭheuh an lo dawng tawh bawk.

Salah chuan, "Ka room-ah nomawi dahna ka nei a, nomawi dang ka hun belh theih nan hmun awl ka dah sa - chu chu ka tih dan phung a ni a, lawmman dang a lo kal leh ka beisei tlat ṭhin," tiin a inrintawk thu a sawi.

Egyptian forward hian tun season-ah FWA footballer of the year, PFA fans' player of the year leh PFA players' player of the year chawimawina a dawng a, PL golden boot a dawn bakah assist ngah ber a nih avangin playmaker of the season award a dawng tel bawk.

Foden a ngai reng
Kum 22 mi Foden-a'n player naupang zinga a ṭha ber award a dawng leh ta a, tun season-ah league match 28 khelin goal kua a khung a, assist vawi nga a nei bawk.

Foden hma hian Manchester United legend Ryan Giggs, Liverpool chhuanvawr Robbie Fowler, United legend Wayne Rooney leh Everton midfielder Dele Alli te te chuan a zawnin PFA young player of the year award hi an lo dawng tawh.

English midfielder Foden hian season hman zawh takah khan City chu Premier League-ah a champion pui a, Pep Guardiola naute hian nomawi chawi dang erawh an nei lo thung.

Hetihlai hian player of the year-a thlan Salah chuan FA Cup leh League Cup-ah Liverpool a champion pui a, mahse, Premier League-ah point khata City phak loin, Champions League final-ah Real Madrid an ngam lo.

Hmeichhe lam
Chelsea forward Sam Kerr chu hmeichhe lamah PFA players' player of the year a ni a, kum 28 mi forward hian FA Women's Super League-a match 20 a khelhah goal 20 a khung a, top scorer a ni.

Kerr hian Chelsea hi WSL leh FA Cup-ah a champion pui. Australian player zinga women's PFA players' player of the year ni thei hmasa ber chuan, "Ka player puite ngeiin he chawimawina dawng tura min thlang hi chawimawina ropui tak a ni a, player tan chuan chawimawina sang ber a ni hial ang," a ti.

Kum 21 mi Hemp chu a zawna a vawi li nan young player of the season a ni a, record thar a siam. City forward hian 2018 khan kum 17 mi niin a vawi khat nan young player of the season chawimawina hi a lo dawng tawh.

Hemp chuan, "Min thlangtu player tam tak hi ka entawn an ni a, anni thlan nih hi ka tan chuan chawimawina a ni," tiin a sawi.