Inter Village Football champion lawmman Rs 1,50,000
Mizoram Football Association leh LBS Suzuki ṭangkawp chuan June 24, Zirtawpni aṭanga khelh ṭan turin LBS Suzuki All Mizoram Inter-Village Football Tournament a buatsaih dawn a, veng leh khua hrang hrang an inpuahchah nasa tawh hle.
Inelna buatsaihtu MFA chuan lawmman tur a tichiang a, champion team-in Rs 1,50,000 leh trophy an dawng ang. Pahnihna pawhin Rs 1,00,000 an dawng pha a, semifinalist tan Rs 40,000 lawmman dawn tur a awm bawk.
Fair Play lawmman siam a ni a, mimal lawmman best player, best forward, best midfielder, best defender leh best goalkeeper tan lawmman siam a ni.
Artificial turf
MFA ruahmanna siam dan chuan inelna hi artificial turf-ah vek khelh tur a ni. Inelna hi Lammual, RG Stadium leh MFA Ground-ah te khelh a ni ang.
Mizoram chhunga artificial turf an phah hmasak berna hmun chu Lammual a ni a, a hawnna pawh June 9, 2011-ah khan neih a ni. Kum 11 a ral leh meuh chuan turf hlutna pawh an pet chhuak tawhah a ngaih theih.
Lammualah hian Bundesliga club Hoffenheim leh German Students National team te a inkhel tawh a, inelna hrang hrang I League 2nd division, Santosh Trophy qualifying round, Mizoram Premier League leh tualchhung inelna lian tak tak khelh a ni tawh.
Tunah erawh Lammual hi inkhelh theihna ni mah se a chul ve ta hle. Mizote tan chuan Lammual hi England-a Wembley Stadium tluk zetin a hlu a, sorkar pawhin inelna lian zawk a thlen leh theih nan a chei ṭhat a ṭul a ni.
Entry fee
June ni 14, Thawhlehni chawhnu dar 2:00 PM thleng Entry Fee (Rs 1,000) hi 9862647664 (Frank Rinpuia)-ah a pek theih. Entry pekna hi screenshot-in whatsapp lamah thawn leh tur a ni.
Entry fee pe tawh zingah hian Kawlbem leh Lallen te an tel a, Mizoram pum huap football inelnaa an vawi khat telna ve ve tur a ni. Hripui vanga hun rei tak inelna lian tham buatsaih theih a nih loh avangin tun ṭumah hian team ṭhahnem tak tel tura beisei a ni.
Hun ṭha chu
Football hmanga enzawn tum tan tun hi hi hun ṭha a ni a, All Mizoram Inter-Village Football Tournament hi football scout-ten an thlir dawn. MFA chuan Mizoram Premier League kalpui a tum thu a tichiang tawh a, MPL club tan player zawnna hun ṭha a ni ang.
MPL club bakah MFA chuan ISL, I-League leh Football Academy lama Scout-te MFA chuan chah a tum a, player tan theihna lantirna hun ṭha a ni.
Lawmman chu
Champions Rs 1,50,000/- & Trophy
Runners Up Rs 1,00,000/- & Trophy
Semi Finalists Rs 40,000/-
Fair Play Rs 20,000/- & Trophy
Best Player Rs 10,000/- & Trophy
Best Forward Rs 5,000/- & Trophy
Best Midfielder Rs 5,000/- & Trophy
Best Defender Rs 5,000/- & Trophy
Best Goalkeeper Rs 5,000/- & Trophy