Khelo India-ah Mizo hmeichhe boxer-te an che ṭha

Khelo India Youth Games chu Panchkula, Haryana-ah neih chhunzawm a ni a, boxing-ah Mizo tleirawl pathum Ruthi Lalhmingṭhai, Naom Chinsangnuam leh Rudy Lalhmingmuani ten an khingpui hnehin quarterfinal an lut vek.

Vawiin hian quarterfinal khelh a ni dawn a, Mizo tleirawl pathum bakah Mizo rawlthar pahnih Laldinsanga (54 kg) leh Vanlalhuala (80 kg) te an inlan bawk ang. Boxing-ah hian bronze medal match a awm hran loh avangin semifinal lut chinin medal an la nghal a, quarterfinal-a an chak chuan a chhe berah medal an la dawn tihna a ni.

Mizo hmeichhe boxer-te an chet ṭhat laiin Mizo boxer pathum Zorammuana, Franky Vanlalruatpuia leh Lalnunzira te erawh an match hmasa berah an chak lo. Coach R. Lalbiaksangi chuan, "Khaw lum dan hi a rapthlak hle. Ṭum dangah chuan January thlaah Khelo India hi khelh ṭhin a ni a, tunah erawh khaw lum lai takin khelh a ni a, Mizote chauh ni loin NorthEast state dang player-te pawhin an harsat," tiin Vanglaini a hrilh.

Sangtei chuan sawi chhun-zawmin, "Tun ṭum hi kan inbuatsaih ṭhat ber ṭum a ni a, medal pawh ṭhahnem tak lak kan inbeisei. Mahse khawlum vangin kan beisei angin kan khel thei lo a, ka naute ṭhenkhatin an thawhrim rah an seng lo tur hi pawi ka ti," tiin a sawi.

Mizoram boxing team hi SYS coach pahnih R. Labiaksangi (manager) leh Lalfakzuala (coach) ten an hruai a ni.

Boxing Results
Mipa - Pre Quarterfinal
48 kg Ashish, Haryana bt Zorammuana, Tuipui
57 kg Lakshay, Delhi bt Franky Vanlalruatpuia, Lunglei
60 kg Arya Negi, Himachal Pradesh bt Lalnunzira, Lunglei
Hmeichhia - Pre Quarterfinal
54 kg Ruthi Lalhmingṭhai, Reiek bt Myllipilli Meghana, Andhra Pradesh
57 kg Naom Chinsangnuam, Chaltlang bt Riya Thapa, Uttarakhand
63 kg Rudy Lalhmingmuani, Lawngtlai bt Khushi, Haryana