MFA-in CRS training a buatsaih

Mizoram Football Association chuan tun season aṭanga kalpui tur player inziah luh dan thar - Centralised Registration System (CRS) zirtirna chu nimin khan MFA Office-ah a buatsaih a, District FA aiawh panga an tel.

Tun ṭum training hi district panga Aizawl, Mamit, Kolasib, Saitual leh Serchhip tana buatsaih a ni a. June 17, 2022 hian Hnahthial, Lunglei, Lawngtlai leh Siaha District te tan Lunglei-ah CRS Workshop hi buatsaih a ni leh ang. Thla tawp lamah Khawzawl leh Champhai District-te a hmunah kal chilhin CRS training hi neihpui leh tum a ni bawk.

MFA Registration Committee chairman Lalrawngbawla'n CRS pawimawhna a sawifiah a, vice chairman K. Lalenghluna'n District FA tana a ṭangkai dante a hrilhfiah.

CRS kalpui a nih hnu hi chuan MFA leh DFA hnuaia player-te nihna kimchang, an pian kum leh an khelh meknate kimchang takin a hmuh theih vek tawh dâwn a, hei hian kawng hrang hrangah awlsamna a thlen ang a, tualchhung football tan hmasawnna rahbi thar a ni.