PL team of the year Son, i tan hmun a awm lo maw?

PFA Premier League team of the year-ah Son Heung-min tan hmun a awm lo. Ni e, i chhiar dik e - penalty vawi khat pawh pet lo chunga Premier League top scorer ni thei hi PL team of the year-a tel turin a ṭha tawk lo!

South Korean forward hi PFA players' player of the year-a a tel loh avang ringawt pawh khan fans tam takin an vuipui tawh a, team of the season-ah pawh a tan hmun a la awm chuang lo - a vanduai takzet.

Son tan hmun a awm loh lai hian Sadio Mane leh Cristiano Ronaldo an lang tel thung a, Son aia lan an phu zawk leh zawk loh hretute chu he thuziak chhiartute hi in ni e.

Kum 37 mi Ronaldo hian league match 30-ah goal 18 khung mah se Champions League khel turin a team a hruai kai zo lo a, match 34-a goal 16 khungtu Mane pawh Son aia thlan chu thil mak a ni.

Sorry Son!
Kum 29 mi Son hian season hman zawh takah khan Tottenham Hotspur tan league match 35 khelin goal 23 a khung a, assist vawi kua ngawt a nei bawk - goal a khung bakah a ṭhiante khung tur a siam tel a, a goal khung zingah penalty a tel miah lo.

Spurs-in Champions League an khelh theih nan player pawimawh a ni a, mahse, Son tan tun season-ah mimal chawimawina dawn tur a awm lo - South Korea international hian en hran a hlawh em ni, tih thlengin zawhna a piang.

South Korea tan vawi 100 inlana goal 32 khungtu hi khawthlang lamin a phu angin fak tawk lo mah se, an ram lam erawhin an fapa rangkachak hi an hre reng a, South Korea-a infiammi chawimawina sang ber Cheongnyong an lo hlan tawh.

PFA team of the year-a thlan tur player hi January khan Professional Footballers' Association-a hruaituten an chhawp chhuak a, chuta ṭang chuan PFA member-ten vote an thlak leh ṭhin a ni.

Liverpool = six
Premier League-ah champion zo ta lo mah se Liverpool -in team of the year-ah player an thawh hnem ber a, Reds player paruk ngawt an hming a lang - goalkeeper Alisson chu City keeper Ederson nen golden glove award dawng dun mah se team of the year-ah chuan Alisson zawk a lang.

Reds right back Trent Alexander-Arnold pawh hi sawisel hlawh viau ṭhin mah se season hman zawh takah khan assist vawi 12 a nei thei a, a player puiten en kan harsa an ti tlat.

Virgil van Dijk dam chian leh hnuah Liverpool tlarhnung ngheh leh takzia hi inhrilh nawn ngai a ni lo - team of the year-a a lang hi a awm ngawih ngawih a, season hmasaa beisei phak lo Thiago Alcântara pawh English football-ah a tlangnel thar a, a che vel chu football mawina phochhuaktu a ni.

Player of the year a nih miau avangin Salah tan lan loh a mawi lo a, Mane lang erawh Spurs forward Son a lan loh avangin sawi a kai ta deuh - a awm lo hran lo.

Player dang
Chelsea aṭanga Real Madrid pantu Antonio Rudiger chu Blues tana season duhawm tak a hman avangin PFA team of the year-ah a lang a, left back-ah Joao Cancelo a lang ve bawk.

Liverpool left back Andrew Robertson-a'n league-ah goal thum khungin assist vawi 10 nei mah se champion team-a tel, goal khat leh assist vawi sarih neitu Cancelo hian a player puite duhsak a hlawh zawk.

Premier League player of the season Kevin De Bruyne pawh a phu ang ngeiin a lang a, City an champion theih nan goal 15 a khung bakah assist vawi riat a nei. City tana a khelhpui Bernardo Silva a lang bawk a, ani hian goal riat a khung bakah assist vawi li a nei.

Manchester United forward thawm lian Cristiano Ronaldo team of the year-ah a lang a, kum 37 mi ni mah se goal 18 ngawt a la khung - Son aia langa ngaih a nih avangin sawiselna thawm erawh a ri ring ta deuh.

PFA Premier League team of the year:

Alisson (Liverpool); Trent Alexander-Arnold (Liverpool), Virgil van Dijk (Liverpool), Antonio Rudiger (Chelsea), Joao Cancelo (Man City); Bernardo Silva (Man City), Thiago Alcantara (Liverpool), Kevin De Bruyne (Man City); Sadio Mane (Liverpool), Cristiano Ronaldo (Manchester United), Mohamed Salah (Liverpool)

PFA Championship team of the year:

Nicholls (Huddersfield), Spence (Nottingham Forest), Adarabioyo (Fulham), Kelly (Bournemouth), Ream (Fulham); Wilson (Fulham), Carvalho (Fulham), Billing (Huddersfield); Mitrovic (Fulham), Solanke (Bournemouth), Brereton Diaz (Blackburn).

PFA Awards
PFA Players’ Player of the Year Mohamed Salah (Liverpool)
PFA Fans’ Player of the Year Mohamed Salah (Liverpool)
PFA Players’ Young Player of the Year Phil Foden (Manchester City)
PFA Players’ Women’s Player of the Year Sam Kerr (Chelsea)
PFA Players’ Women’s Young Player of the Year Lauren Hemp (Manchester City)
PFA Merit Award Roy Hodgson (Watford)
PFA Merit Award Hope Powell (Brighton & Hove Albion)