NT-a'n Jayson a hlau lo

Mizo boxer lar NT Lalbiakkima chuan Dubai khawpuia fight a neih tur atan ngawrh takin training a nei a, 'Zo Keite' hming lem an pek boxer chuan, "Fight hmachhawn ka châk tawh," tiin Vanglaini a hrilh.

Siah boxer NT-a hian WBC Asia continental title chuh turin Philippines boxer Jayson Vayson chu June 18 khian a hmachhawn dawn a, a boxer hmachhawn tur hi vawi 10 inlana tlawm la nei lo a nih avangin a tawh a khirh ang.

Mahse, NT-a chuan, "Professional boxing-a fight hautak hmachhawn hi ka châk a, Jayson nena kan inhnek tur hi ka huphurhna aiin ka phurna a sang zawk," tiin Vanglaini a hrilh.

NT-a hian vawi li professional fight a hmachhawnah hnehna a la chang vek a, a khingpuite hi a knockout vek bawk - Jayson erawh vawi kua inhnek a hmachhawna vawi nga a khingpui knockout thei a ni a, a dan a dang ang.

IBA intercontinental champion lai NT-a hian ruahman dan chuan June 14, Thawhlehniah an inhnekna tur hmun Dubai khawpui a pan dawn a, Dubai World Trade Centre-a Sheikh AL Maktoum Hall-ah Jayson nen hian an inhnek ang.

Kum 24 mi Jayson hian vawi 10 inhnek a hmachhawnah vawi kua hnehna a chang a, vawi khat erawh 'no contest' ah puan a ni. Philippines boxer hian 'no contest' a puan tak inhnekah hian Tibo Monabesa a hmachhawn a, WBC international light-flyweight title inchuhna a ni.

Jakarta khawpuia inhnekah hian mi tam takin Jayson hi chak zawkah an ngai a, mahse, judge lamin rin loh takin Monabesa hi chakah an puang.Rin loh taka result awm hian Indonesian media titi a luah zui a, WBC pawhin fight hi ennawnin, judge-ten chak zawka Monabesa an puanna chu felhlel a awmah ngaiin, 'no contest' ah an puan phah a ni.

NT-a bakah hian Tuipui boxer Laldingliana chu a inlan dawn bawk a, The Mizo Hunter hminglem an pek boxer hian Alimzhan Tursunov chu featherweight-ah a hmachhawn dawn.

Dingliana hian professional fight vawi thum a hmachhawnah hnehna a la chang vek a, a hmachhawn tur Kazakhstan boxer hian vawi nga fight a hmachhawnah vawi li hnehna a chang a, vawi khat a tlawm thung.

June 18 fight hi Zonet-ah pay-per-view kaltlanga en theih tur a ni dawn a, television lama en duh tan Zonet distributor hnenah Rs.100 pein a en theih ang a, online-a en duh tan Zonet Empai subscribe tute tan a en theih dawn bawk - Empai hi Rs. 199 aṭanga inṭanin a subscribe theih.