Dan theih loh Zarkawt BCA
Champion lai chu champion lai nge nge an lo ni e! Zarkawt BCA chuan Mizoram Super League 7-ah match thum an khel a, an chak fai vek. Point ruk hmuin team paruk inel zingah a chungnung ber luahtu an ni.
Zarkawt team hian Ningani zan khan Chanmari Vikings chu 82-63 in an hneh a, inkhel tir lamah inhnehtawk viau mah se second half-ah team ṭha zawk an nihna an lantir, an phu ang ngeiin hnehna pawh an chang.
Chanmari Vikings erawh match hnih an khelh tawhah an tlawm ve ve. Mission Veng Vikings an nih laia champion tawh Vikings tan a sang pali zinga tel phak a hautak tawh dawn a, kawng erawh a la inhawng ve bawk.
BCA an ṭha
Inkhel ṭan hmain Zarkawt BCA coach Lalruatfela'n, "A ṭha ber kan ni bik lo, kan vannei rih a ni," tiin inngaitlawm takin Vanglaini a hrilh. R. Dengṭhuama Indoor Stadium, Mualpuia inkhelah erawh team ṭha ber an nihna a lang.
Chawlhlawk lai chuan BCA hian point hnih bakin hma an hruai thei lo, quarter hnuhnung pahnihah erawh an kal fal ta deuh. Lalrina Renthlei bawkin point a nei hnem ber. Tuikhuahtlang star hian point 31 a neih bakah rebound ṭum 15 a la.
Lalrina hian an match hnuhnung zawkah pawh point nei hnem ber dinhmun a lo luah tawh, state pawn player awmna karah pawh Mizo tlangval a langsar. Joseph Frederick Allen (28 points) a hmuhnawm a, mimal fak tur kan zawng a nih erawh chuan Lalrina a ni ang.
Vikinga an buai
Mizo hlangin an khel a, team thar Mission Veng Hotshots an ngam lo. American player Raymond Edward Miller an neih hnuah pawh Vikings an la chak thei chuang lo - match hnih a zawna chak lo an nih avangin an dinhmun a ṭha rih lo.
Season hmasa khan Miller hian point a nei thei viau, kuminah pawh a lakah beisei a sang. Amaherawhchu, point 18 a neih chu chakpui nan a tawk zo lo; a mamawh ang ball a hmu tawk lo nge a hun ṭha neih a hlah hnem tih chu zir chian tham a ni ang.
H. Lalhruaitluanga enkawl team hian June 16, Ninganiah match an nei leh dawn chauh, anmahni ang bawka chak la nei lo Chawnpui an hmachhawn ang. Inbuatsaihna hun an ngah a, 6ft 8in a sang Miller hmang thiam lehzual tura inzir an mamawh.