South Africa-in India an hneh

Ningani zan khan South Africa leh India ten T20 match nga an khelh tura hmasa ber an khel a, Proteas hian wicket sarihin hnehna an chang. Match hnihna hi June 12, Pathianni zan dar 7:00 hian Barabati Stadium, Odisha-ah an khel leh ang.

Arun Jaitley Stadium, New Delhi-a inkhelah mikhual team South Africa-in vawm hmasak an thlang a, India-in bul an ṭan chhe lo. Opener Ishan Kishan-a'n 76 runs a siam a, batter dang Ruturaj Gaikwad (23), Shreyas Iyer (35), Rishabh Pant (29), Hardik Pandya (31*) te an chet ṭhat bawk avangin 211/4 runs an siam.

India hian target ṭha tak siam mah se South Africa batter-ten an theihna an pholang a, IPL-ah pawh player langsar ni pha Rassie van der Dussen (75*) leh David Miller (64*) te hmangin hnehna an chang.

India captain Rishabh Pant chuan, "Chakna tur khawp runs kan siam a, a vawm lamah kan che fuh tawk lo. Miller leh Van der Dussen te an khel ṭha em a ni," tiin a sawi.