Nunna thapin kan intlansiak - Verstappen

Formula 1 thuneitu lamin ruahmanna thar an tarlang a, hetih lai hian driver-te tana hlawh tamna leh hamṭhatna lam dah pawimawh a ni lo. World champion ni lai Max Verstappen chuan nunna thapa intlansiak an nih thu a sawi.

Monaco Grand Prix an tlan zawh khan, world champion vawi hnih ni tawh Fernando Alonso pawhin driver tana hamṭhatna leh, an hmasawn zelna tur chu ngaihpawimawh ni se a duh thu a lo sawi tawh bawk.

Red Bull driver Verstappen chuan, "F1 infiamna hian hma a sawn zel, team pawhin sum a lakluh belh zel bawk. Kawng hrang hrangin a lar thar a, hmalam panin kan kal mek zel bawk a ni.

"Hetih lai hian driver hamṭhatna tur erawh a la chiang thei lo, a nihna takah chuan mahni nunna thapin intlansiak kan hmachhawn, hetiang chunga kan duh ang a thleng lo hi chu a fuh chiah lo," tiin a sawi.

F1 neitu lamin intlansiak hi a tam thei ang ber neih an duhin an tum zel, hetih lai hian sumdawnna lama hlawk zawk an ngaihtuah bawk. A hmuna entu len tam lohna Monaco GP pawh tihtawp theih dinhmunah a ding.

Thuneitu Liberty Media hian F1 hmasawnna an ngaihtuah rual hian sumdawnna lam an kalpui mah mah tih chu fans ṭhenkhatin an sawiselna a ni a. Eng ang takin nge an kalpui zel dawn tih erawh hriat a la ni lo.

Pathianni tlai dar 4:30 hian Azerbaijan Grand Prix an tlan leh dawn, tun season intlansiak an neih tawh chinah Verstappen chuan point 125 hmuin hma a la hruai zel, a hnungah Charles Leclerc (116 points) a awm.

Ferrari-in hma sawn viau mah se, driver champion lai Max neitu Red Bull chuan team championship-ah hma an la hruai. Verstappen bakah Sergio Perez neitu Red Bull hnungah Ferrari leh champion lai Mercedes te an awm.