A thiam pariat zingah Murray a tel

Andy Murray pawh a inkhelh thiamna grass court-ah chuan a la che fuh chho zel. Wimbledon inbuatsaihna zinga pakhat Stuttgart Open khelh laiah quarterfinal a inhlangkai.

Ningani zan inkhelah Murray hian Alexander Bublik chu 6-3, 7-6 (7-4) in a hneh. A match lehpekah chuan seeded pakhatna Stefanos Tsitsipas nen an inhmachhawn leh ang, semifinal luh chu a awlsam dawn lo.

Grand Slam vawi thum champion tawh Murray-a'n a ṭha thei ang berin Wimbledon khelh a tum, chuvang chuan inbuatsaihna pawh a tam thei ang neih ngei a tum bawk - nomawi a chawi thei a nih chuan atan duhthusam a ni ang.

Inkhel dangah tualchhuang player Oscar Otte chuan seeded palina Denis Shapovalov 7-6 (6), 7-6 (4) in a hneh a, season kal laia tournament a khelh hoah a vawi thum nan quarterfinal a lut; French player Benjamin Bonzi nen an intum leh dawn.

Italy tlangval Lorenzo Sonego chuan Jan-Lennard Struff chu 7-6 (2), 7-6 (4) in a hneh, inkhel hi ruah sur avangin tih tawp lailawk a ni a, an khelh chhunzawm hnuah Sonego a chungnung - a match lehpekah a hnampui Matteo Berrettini a hmachhawn ang.