Inter School Chess a hlawhtling

MZP leh Mizoram Chess Association ṭangkawpin an buatsaih 9th Mizoram Inter-School Chess Championship chu June 8-9, 2022 chhung khan Synod Conference Centre, Aizawlah neih a ni a, a hlawhtling hle.

St Pauls Hr Sec School chu Higher Secondary leh High School Section-ah pakhatna an ni a, Middle School Section-ah Rosebud School chu pakhatna niin Primary School Section-ah Mary Mount School chu pakhatna an ni.

Kharna inkhawma khuallian K. Vanlalvena, MP (Rajya Sabha) chuan, "Chess hi infiamna thianghlim leh hautak si lo, mi rethei ber pawhin kan khelh theih a ni a. Lehkha zirna kawnga kan rilru sawizawina atan leh tichak turin a ṭha em em a ni. Taksa pianphung len leh tet a pawimawh loh avangin keini Mizote khelh chi, khawvel huap pawha kan lan theihna tur chu Chess game hi a ni.

"Eizawnna atan hman kan tum kher lo a nih pawhin, eng hna thawk leh eng timi pawh ni ila, a tam thei ang berin khel ila, kan hnathawhna kawng hrang hrangah kan thluak a tichakin min pui thei a ni, Mizote hian Chess game hi uar zawkin i khel zel ang u,” tiin a sawi.