Shanghai Shenhua stadium a kang
Chinese Super League club Shanghai Shenhua khelmual Hongkou Football Stadium chu Thawhlehni zing khan kang meiin a tichhia a, hliam an awm lo.
China ram thuthar thehdarhtu Xinhua-in a tarlan danin kangmei chhuah hun hi an tualchhung sana zing dar 8:30 vel niin an ziak. Sorkar thu chhuak chuan kangmei chhuah chhan tak hi chhui chian mek a nih thu an puang bawk.
Stadium-a kangmei chhuak hian khelmual (pitch) leh ṭhutna bik chu a tichhe lo niin a lang a, official-in la puang lo mah se stadium chhunga rock climbing centre aṭanga kangmei chhuak anga ngaih a ni.
Mipui 33,000 lenna stadium hi a kan avangin Shanghai Shenhua hian an muala an khelh leh hmasak ber chu an sawn ngei a ṭul dawn niin a lang bawk.
Tevez-a khelhna
Chinese club-in sum an hmang tam a, khawvel huapa player langsar an lakluh tam avangin Chinese Super League-in ngaihven a hlawh hle.
Shanghai Shenhua larna chhan tak chu khawvel-a footballer hlawh tam ber ni tura Carlos Tevez an lakluh vang a ni. Chinese club hian Argentine forward Tevez hi kar khatah £615,000 hlawh tirin an ram club Boca Juniors aṭangin an thlem chhuak.
Shanghai hian Tevez bakah Inter Milan leh Newcastle United kawr ha tawh Obafemi Martins, Colombian pahnih Fredy Guarin leh Giovanni Moreno te an nei bawk. Premier League-a Chelsea champion puitu Demba Ba erawh Chinese club ta ni mah se Besiktas-ah loan-in an khel mek.
Palinaah an awm
Uruguayan coach Gus Poyet-a enkawl Shanghai Shenhua hian an match hmasa berah Jiangsu Suning chu 4-0 zetin sawp a, an match hnihnaah Tianjin Quanjian nen 1-1 a an inhnehtawk avangin table-ah palinaah an awm mek.
Shanghai Shenhua hian April 16 khian an mualah Changchun Yatai an hmachhawn dawn a, he inkhel hi Hongkou Football Stadium-a khelh theih a beiseiawm loh.
Chinese Super League-ah hian Shanghai SIPG, Shandong Luneng Taishan leh Guangzhou R&F ten match hnihah point ruk an hmu vek a. Brazilian player Oscar leh Hulk-a khelhna Shanghai SIPG chuan goal khung tam berin hmahruaitu an ni.