Myanmar ngamtu India

AFC Asian Cup UAE 2019 qualifier-a an match hmasa berah India chuan 1-0 in khualmualah Myanmar an hneh.

India hi kum 64 hnua Myanmar khelmualaan chak leh hmasak ber a ni a, Mizo tlangval Jeje Lalpekhlua chu player pawimawh a ni. India tan captain Sunil Chhetri-a'n goal awm chhun a khung a, India goal khungna kawngah Hnahthial tlangval Jeje-a hnathawh hmuh hmaih theih a ni lo.

Constantine duhthlanna
India coach Stephen Constantine-a'n Mizo pathum Jeje Lalpekhlua, Daniel Lalhlimpuia leh Jerry Lalrinzuala te squad-ah ko mah se Myanmar laka inkhel bul ṭantu awmchhun chu Jeje a ni a, rawlthar Daniel leh Jerry te an lut ve lo.

English coach-in Myanmar lakah 4-4-2 formation hmangin tlarhmaah Jeje leh striker Robin Singh a inkawptir a, captain Sunil Chhetri leh Jackichand Singh te chu mual sir lamah awmin khelmual laiah Rowllin Borges leh Eugeneson Lyngdoh an inkawp.

Tlarhnungah Pritam Kotal, Sandesh Jhingan, Anas Edathodika leh Naryan Das te ding hoin Gurpreet Singh Sandhu chu siban nghaktu a ni.

Myanmar an tlangnel
Yangon khawpuia inkhelah Myanmar-in mualneitu an ni tih an hrechiang a, inkhel ṭan ­tirh phat aṭangin India an nawr nghal. Tlar hmaah rawlthar duhawm Aung Thu leh Kyaw Ko Ko chu an innghahna an ni a, a khat mawi tawkin India tlarhnung an chhaih buai.

Myanmar tan Koko-a'n Tin Win Aung hnen aṭanga a ball hmuh a khung loh hnu lawkah Yangon United striker chhuanvawr hian Aung Thu tan chance ṭha zet a siamsak ve thung a, ball-in goalkeeper Gulpreet Singh a pelh vek hnua a pet hman lo chu kum 20-a upa striker hian a ui ve khawp ang.

India-in ball chang tam lo mah se chance ṭha nei lo erawh an ni bik lo. Mizo tlangval Jeje-a'n yard 30 vel aṭangin goal zawnah a pet thei lo a, he mi hnu hian Jackichand-a'n hnai takah a pet over. Vei lam aṭanga Robin Singh ball cross phei Jeje-a'n pet hman lo mah se Manipur winger tan chance ṭha bik a ni a, Jacki hian goal ruakah a pet over.

India tan Udanta
Chawlhlawk hnuah pawh Myanmar an che ṭha zawk -, Ko Ko leh captain Yan Aung Kyaw ten chance hlauhawm an nei nghal zat. Myanmar-in coach thar Gerd Zeise hnuaiah game mawi tak an khel.

India coach Constantine-a'n ṭangkaina nei lo Robin Singh la chhuakin Udanta Singh a luhtir a, Manipur winger hi mual ding lam sirah awmin a laiah Sunil Chhetri a tawlh phei thung. Udanta tlan chakna hmangin India-in counter attack hman ṭangkai an tum a, a tawp an hlawhtling.

Minute 90-na a ni a, Mizo tlangval Jeje Lalpekhlua'n a ball chan chu mual ding lama awm Udanta Singh tana um luh turin ball ṭha zet mai a vawrh lut. Bengaluru winger tlan chak Udanta hian ball a tlan luh pui a, Sunil Chhetri tan a pe. India captain-in striker class sang a nihzia pholan nan goal-ah a chantir a, India an chak.

Engtin zel?
India hi Group A-ah Kyrgyzstan, Myanmar leh Macau nen an awm a, vawi hnih ṭheuh an inkhelh kual hnuah a sang pahnihin Asian Cup an khel dawn.

English coach Constantine-a kaihhruai India-in khualmuala Myanmar an hneh avangin kum 2009-a UAE-a neih tur Asian Cup khel turin bul an ṭan ṭha hle.