Chhinga Veng an vannei zawk

NECS Cup 2017 final khel turin Chhinga Veng chuan penalty shootout-ah Thing­sualthliah 4-2 in an hneh.

Veng inel­naa la champion ngai lo Chhinga Veng hian inelna lian thama final an luh hmasak ber­ah quarterfinal-a 7-0 zeta an sawp tawh Bawngkawn an hma­­chhawn dawn. March 30 tlai dar 2:00-ah nomawi in­chuhna hi Lammualah neih a ni ang.

Nimin Lammula inkhelah Ramhlun North pet chhuaktu Thingsulthliahin inkhel bul an

ṭan ṭha zawk a, minute 22-na lekah Dinthar FC left back Lalbiakzuala freekick pet aṭanga ball lo kal chu Isak Vanlalruatfela'n goal-ah chan­tirin an team hma a hruai pui a, Chhinga Veng keeper Sangtluanga'n a hna thawk ṭha tawk lo.

TST tana goal khungtu Isak-a hian Tuikual North an sawp ṭumin goal hnih a khung tawh bawk a, hun chanve hmalamah goal a lut tawh lo.

Second half-ah Chhinga Veng ben harhin an awm a, kumin NECS Cup top scorer ni lai Vanlallawma chuan minute 74-naah an si phurh a sut - MFA Cup 2016 best player tan tun inelnaa a goal 14-na a ni tawh. An match hmasa paruk aṭanga goal 35 zet khung thei Chhinga Vengin goal dang an khung belh thei tawh lo.

Team pahnihte hun pang­ngaiah goal khat ve ve bak an khung thei lo a, extra time khelh a nih hnuah pawh goal dang a luih zui loh avangin penalty shootout hmanga chak zawk zawn a ni.

Thingsulthliah captain Lalram­felpuia-a'n a club khelh­na Chhinga Veng lamah a khung thei lo a, keeper Sangtluanga'n a dan sak. Chhinga Veng tana pettu Zomuanpuia, Rochhar­zela, F. Lalnuntluanga leh Vanlallawma ten an pet goal vek a, pressure sangah TST tlangval Lalhlupuia'n woodwork a pet ber a, Aizawl khaw pawn semi final thleng awm chhun Thingsulthliah beiseina a tawp.

Coach H. Lalremruata kaih­hruai Chhinga Veng hi Bawngkawn sawp tawhtu an nih vangin rinkai zawk an ni ang.

Nimin Inkhel Result
Chhinga Veng 1 - 1 Thingsulthliah
(Chhinga Veng hi penalty shootout-ah 4-2 in an chak)
CHI : Vanlallawma 74'
THI : Isak Vanlalruatfela 22'
MoM : Lalfelpuia, Thingsulthliah
Final - March 30, Ningani
2:00 PM Bawngkawn Vs Chhinga Veng