MSL-ah vawi khat nan rematch a awm dawn ; April 15 zanah Vikings vs Serpents

Mizoram chhunga basketball inelna sang ber Mizoram Super League-a inkhel hmuhnawm ber zinga mi Mission Veng Vikings leh Zarkawt Serpents te chu April 15, Inrinni zan dar 8:00-ah khelh nawn leh a ni dawn.

March 24, Zirtawpni zan MSL3 inkhelah Vikings-in Michael F. Lalawmpuia freethrow hmangin Zarkawt Serpents chu 67-66 in an hneh. Amaherawhchu Serpents-in inkhelh ban rualin Ramhlun North tlangval Michael F-a'n freethrow a hlawhchhuah hian buzzer a ri (hun a tawp) hman tihin sawiselna an thehlut a, March 27 chawhnua MBBA Technical Committee leh MSL Board joint meeting-in Zarkawt club complaint hi pawm sakin rematch turin thutlukna an siam.

MBBA thu chhuak

March 27-a MBBA Technical Committee leh MSL Board joint meeting chuan Mission Veng Vikings leh Zarkawt Serpents ten MSL3 match no. 3 an khelha 4th quarter tawpa referee-in foul a ham chu video replay te ngun taka a zir chian hnuah 'time up buzzer' rik hnuah a ni tih a pawm. Hetiang a nih avang hian Mission Veng Vikings leh Zarkawt Serpents te hi April 15, Inrinni zan dar 8:00 hian match no. 3-a an squad ngai angin rematch turin a rel a ni.

Joint meeting thuchhuakah hian BFI technical chairman leh FIBA representative Norman Issac chu thlutlukna siam turin an rawn thu an tarlan bawk.

Thil thlen dan chiah

March 24 zan inkhelah 66-66 a ni a, Serpents-in chak theihna hun ṭha an nei. Champhai tlangval K. Lalramropuia (LR Ju­nior) chuan dinglam aṭangin a hun ṭha neih a hlah a, Vikings captain Moses Zoremmawia'n rebound lain Michael F-a'n ball a chang fuh leh a, Ramhlun North tlangval ball lak sak tumtu Serpents guard Lalthankhuma a foul. Team penalty a nih tawh avangin Vikings-in freethrow an hmu a, Michael F-a'n a hmasak zawk a lut nghal. Hun a tawp tawh avangin khelh zui tur a awm tawh lo a, Vikings an chak.

Amaherawhchu, Serpents captain Hming­than­mawia'n FIBA dan ang thlapin inkhelh banah a protest nghal a, inkhelh ban aṭanga minute 20 pawh tling loah Zarkawt club-in lehkha an thehluh nghal avangin technical committee-in an bawhzui a ṭul ta a ni.

Thutlukna chu

MBBA technical committee chairman Lalrinawma chuan, "Uluk takin thil thlen dan kan en nawn a, hmanraw awm thei ang ang kan hmang ṭangkai bawk. TV replay bakah a ri (sound) ringawt te kan ngaihthlak hnuin buzzer rik hnuah referee whistle kha a ri a ni," tiin Vanglaini palai a hrilh.

Dan chungchang sawi zuiin Rinawma chuan, "Thutlukna pawimawh bik a nih avang­in BFI technical chairman leh FIBA representative Norman Issac kan bia a. Ani chuan buzzer rik hnua thil hrim hrim chu pawm loh tur tiin min chhang. Dan zawm thlapin protest an nei a, an ṭan chhan a dik bawk si avangin dan anga thutlukna kan siam a ṭul a ni," tiin rematch a awmchhan a sawi fiah.

Referee chhan zuiin Rinawma chuan, "Foul kha a awm ngei vangin referee-in tihsual a nei lo a, buzzer ri kha a ri ring tawk lo bawk," tiin a sawi.

Buaina dang

March 23 zanah Zarkawt BCA-in Tuikual South chu 89-87 in an hneh a, Phenghphehlep lamin point chhiar sual a awmah ngaiin protest mah se a hlawhtling lo.

MBBA technical committee chairman Rinawma chuan, "Tuikual South leh Zarkawt BCA inkhel kha a ziaktu lamin an tidik vek a, board-a tarchhuahah khan khawl felhlel vangin tihsual a awm thung. Board kha TV lama tihchhuah nana hman a nih avangin TV lamah point tih dik lo a ni a, scoresheet-ah a dik vek avangin TKS protest hi pawm sak a ni lo," tiin Tuikual South rematch an dilna pawmsak a nih loh chhan a sawi.

Lawm leh lawm lo

Zarkawt Serpents coach Victor Vanlal­mawia chuan, "Technical committee-in thutlukna dik an siam a ngai. Ka ngaihdan chuan Zirtawpni zan khan kan la khel zo lo a, kan khelh hmabak kan khel leh turah ka ngai a, thutluknaah hian kan lawm hle a ni," tiin Vanglaini palai a hrilh a, dinhmun ṭha zawka an din loh thu a sawi lang bawk.

Mission Veng Vikings coach Reuben Lalchhandama chuan, "Sawi vak theih kan nei lo a, club-a kan hotute thutlukna angin kan awm ang. Kan inlungrualna kha a pawimawh ber a ni a, fair taka inelna kalpui ṭha kan ti bawk. Kan player-te rilru a na a, tuna an thutlukna hi a hmunah siam ni se tawrh thiam a awl ang. Amaherawhchu ni thum hnua thutlukna an siam hi hriatthiam a har a ni," tiin an beisei loh thu thutlukna an hmuh thu a sawi.

Mission Veng manager H. Lalhruai­tluanga chuan, "Kan appeal dawn tih chu a chiang a, chumi hnua kan hmalak dan tur erawh kan la sawi thei lo. Hollows nena kan inkhel tur atana kan inpuahchah laia hetiang thutlukna kan hria hi a pawina belhchhahtu chu a ni," tiin thutlukna pawm mai an tum loh thu a sawi ve bawk.

Nizan khan Zarkawt Serpents hian Tuikual South an hmachhawn a, Ningani zan hian Vikings-in MSL kaithar Chanmari Hollows an hmachhawn ve bawk ang.