Del Potro hnehtu Roger Federer

Roger Federer tan kum duhawm a nih chhunzawm zel. Grand Slam vawi 18 champion tawh Federer hian Thawhṭanni zan khan Juan Martin del Potro hnehin Mimai Open last 16 a lut; Federer hian kuminah match 15 hnehna a channa chiah a ni a, vawi khat chiah chak loh a la nei.

Crandon Park-a inkhelah kum 35-a upa Federer hian Argentina tlangval Del Potro lakah 6-3, 6-4 in hnehna a chang, quarterfinal lut tur chuan seeded 14-na Roberto Bautista Agut a paltlang leh a ngai ang. Swiss star Federer hian ATP World Tour Masters 1000 tournament bikah match 46 hnehna a chang tawh. Grand Slam dawta inelna ngaihhlutah hian ṭum 13 a chak lo tawh thung.

Inkhel dangah seeded pakhatna Stan Wawrinka chuan Malek Jaziri 6-3, 6-4 in a hneh. Grand Slam vawi thum champion tawh Wawrinka hian a vawi khat nan Miami Open nomawi a beisei mek.

Australian rawlthar Nick Kyr­gios chuan inkhel inhnehtawk takah Ivo Karlovic chu 6-4, 6-7 (4-7), 7-6 (7-2) in a hneh hram. Seeded 10-na Tomas Berdych-a'n Gilles Muller 6-3, 6-4 in a hneh bawk.