Henry-a'n Wenger a zah

Arsenal tana goal khung hnem ber Thierry Henry chuan player a nih laia a club Gunners enkawl a hreh lo tih a sawi a, chutihrualin amah siam liantu Arsene Wenger a zah thu a sawi bawk.

Gunners manager Wenger-a'n tun hnaiah inelna hrang hrang a hmachhawn hnuhnung pakuaah ṭum ruk ngawt a naute a tlawmpui a, season tawp ruala a contract tawp tur, kum hnih dang atan pawt sei tura an sawmna pawh a la pawm lo.

Arsenal tan inelna hrang hranga goal 228 khungtu Henry chuan, "Wenger-a hnathawh ka hrechiang a, tun thlengin ka zah hle. Amah thlak tur anga min sawi thawm a awm tih ka hria, he hna thawk tur hian ka inpeih nge peih loh chu hriat ni lo mah se ṭha taka hna thawk thei tura inbuatsaih erawh ka mamawh tih ka chiang," tiin a sawi.

Kum 39-a upa Henry hian tun hmain Gunners player naupang lam chu a lo enkawl tawh a, nikum August thla aṭang khan Belgium national team coach Roberto Martinez hnuaiah assistant manager hna a thawk.