Sao Paulo tan Caio a rinawm

Paris Saint-Germain nena sawizawm hlawh mek Rodrigo Caio-a'n Europe lam hawi a la tum rih lo niin a lang. Brazilian club Sao Paulo tan kum 2021 thleng khel turin contract thar a ziak.

Brazil international chuan, "Contract thar ka ziak thei hi ka hlim takzet a, kan chhungkua hi Sao Paulo chhuak kan nih avangin a hlimawm lehzual a ni," a ti.

Kum 23-a upa centre back leh midfiled a khel kawp thei Caio hi kum 2016 Olympic-a Brazil-in football-a gold an lakna kawngah a thawhhlawk hle a, hemi hnu hian Brazil coach Tite hnuaiah ram tan hmun pawimawh a chang chho deuh reng.

Rodrigo hi PSG mai bakah Atletico Madrid leh Sevilla nen pawh sawi­zawm a ni a, kum 2015 khan Valencia nen inbiakna thui tak kalpui hman mah se a tlawlh leh a ni.