Test Series Australia ngamtu India

India chuan nimin khan Test series an khelh meka test 4-na leh a tawpna berah Australia chu wicket riata an hneh avangin series hi 2-1 in an la. Mualneitu India hian second innings-ah chak turin run 106 an mamawh a, wicket hnih chiah hloha an target umphain hnehna an chang chiang hle.

India hian an khelmuala test an khelh hnuhnung 13-ah vawi 10 hnehna an chang thei a, an team hneh zingah ram langsar New Zealand, England, Bangladesh leh Australia an tel avangin an record hi a chhuan­awm hle - test 13 a hnehna an chan loh awmchhun chu tun series khelh mek an match hmasa bera Australia an hneh loh kha a ni.

Inkhel hmasa

India-in test series inlan hmasa berah Australia hi run 333 ngawtin an ngam lo a, India a mualpho a, sawisel an tawk nasa hle. Mahse, series kal meka test 2-ah erawh India an harh chhuak a, an mikhual hi run 75-a hnehin beiseina thar an insiam. A vawi thumnaah erawh chak zawk awm loin team pahnih an inṭhen a, an inhnehtawk.

Test 4 hi Inrinni khan Hima­­­chal Pradesh Cricket Association Stadium, Dharam­sala-ah khelh ṭan a ni a, hemi hmaa test match vawi thum khelhah team pahnih hi vawi khat ve ve chaka vawi khat an inhnehtawk avangin test 4-a chak zawk hi series la tur an ni. A sawi dan awlsamah chuan test 4 hi series final a ni - hliam vangin India tan captain Virat Kohli a inlan thei lo zui.

Test 4 chu

Australia-in an mikhualna ramah an hmelma kumhlun India hneh loh an duh lo a, 1st innings-ah over 88.3 khelin run 300 ngawt an vaw chhuak a, captain Steven Smith chuan run 111 siamin team tana thawh hlawk ber a ni. India an duai bik lo. Over 118.1-a an wicket an hloh vek hma zawng an bat a, run 332 an siam.

Second innings-ah Aus­tralia-in over 53.5 an bat-ah run 137 chiah siamin wicket an hloh vek a, India-in an muala series la tura an run mamawh zat chu run 106 chauh a ni. Mualneitu team tan chak turin run siam tam a ngai lo niin lang mah se run riat lek siamtu Murali Vijay leh run siam lo Cheteshwar Pujara te an out nghal avangin talbuai thei dinhmunah an ding hman.

Mahse, India tan KL Rahul chuan run 51 siamin a tawp thleng a dam a, Ajinkya Rahane chuan run 38 siama a thlawp ṭhat bawk avangin over 23.5-ah run 106 tlinin India an chak.

Captain thukhawchang

A dar hliam vangin captain Kohli-a'n India a ho thei lo a, hetichunga India-in hnehna an chang thei chu a hlim hle. Cricket khawvela player langsar ber pawl ni mek Kohli chuan, "Series kan lak tawha duhawm ber a ni hial ang. Ka ṭhianten khelmual chhunga an puitlinna an lantir leh mawhphurhna an lak dan kha a hmuhnawm takzet a ni. Kan fitness chungchangah kaldan phung thar hmangin kan inenkawl a, kan tifuh niin ka hria. Season duhawm tak kan hmang a, tupawhin kan mawhphurhna huaisen takin kan la vek a ni," tiin a hlim hle.

Australia tan captain Steve Smith-a'n series khelh zawh takah vawi thum ngawt century a vaw chhuak a, hetichung hian hnehna chang zo lo mah se an khelh dana a hlim thu a sawi. Kum 27-a upa batsman chuan, "Series ropui tak kan khel a, test series ka hmachhawn tawha ropui ber pawl a ni hial ang. India kan kal hma khan mi tam zawkin hnehna chang lo turah min dah nghal ngawt a, ka naute khelh dan erawh chhuan tham a ni. Kan thiam loh awmchhun erawh tawlhthluk zeuh kan ching kha a ni a, India lakah chuan vawi khat chetsual hi a pawi em em a ni," tiin a sawi.