Halep chak hram

Miami Open seeded pathumna Simona Halep chuan set hmasa ber a hloh zet hnuah Sam Stosur chu 4-6, 7-5, 6-2 a lehthalin quarterfinal a lut. Thawhṭanni zan last 16 inkhel dangah Angelique Kerber leh Venus Williams ten hnehna an chang ve bawk.

Kum 25-a upa Halep chuan, "2014 Doha Open kan khelh ṭum khan set hmasa ber ka hloh hnuah set hnihnaah ka khingpui Kanepi khan match point a hmu hma a, ka pawtthla hram. Kha mi ṭum ang chiah khan tun ṭumah a thleng leh a, a mak angreng hle," tiin a sawi.

Romanina star Halep hian Britain chhuan­vawr Johanna Konta a hmachhawn leh dawn. Konta hian last 16 paltlang turin Lara Arruabarrena chu 7-5, 6-1 in a lo hneh ve bawk a ni.

Inkhel dangah world number 1 Kerber chuan darkar khat leh minute hnih chhungin Japan nula Risa Ozaki 6-2, 6-2 in a hneh. Grand Slam vawi sarih champion tawh Venus chuan seeded pasarihna Svetlana Kuznetsova chu 6-3, 7-6 (7/4) in a hneh ve bawk - Venus leh Kerber te hi quarterfinal-ah an inhmachhawn leh ang.