AIFF kalphung thar duang turin tur COA leh State Association aiawhte an inkawm

All India Football Federation buaina tawh mêk chingfel tur leh AIFF dan (constitution) thar tur ngaihtuahin June 11 khan Supreme Court-in AIFF enkawl tura a ruat Committee of Administrators leh AIFF hnuaia state association aiawh mi pangate Football House, New Delhi-ah boruak ṭha tak hnuaiah an inkawm a, AIFF thar siam tumin hma an la mêk.

AIFF hi sorkar inkaihhruaina National Sports Code zawm loa a kal avang leh, a hun taka inthlan an buatsaih loh avangin May 18, 2022 khan Supreme Court chuan an president Praful Patel chu a chawlhtir a, ani rual hian AIFF Executive Committee pawh chawlhtir an ni a, inthlanna buatsaih a nih hmaa AIFF enkawl lailawk turin COA hi a ruat a - COA hi AIFF inrelbawlnaa thuneitu säng ber a ni ta a ni.

Tute nge COA chu?
Supreme Court chuan Delhi Football Club aṭanga thubuai thehluh a ngaihtuah hnuin AIFF hruaitute hun chu tihtawp ṭha a ti a, a enkawltu turin COA a din.

COA hotu ber atan Supreme Court judge hlui AR Dave ruat a ni a, ani bakah hian India football captain hlui Bhaskar Ganguly leh Dr SY Quraishi ( Chief Election Commissioner of India hlui) chu ruat an ni.

Supreme Court chuan COA chu AIFF Constitution thar duang tur leh June 30 hmaa thehlut turin hun a pe ta a ni.

State FA aiawh inhmukhawm
Supreme Court-in AIFF a ṭhiah tâk avang leh hruaitu awmlai a chawlhtir tâk avang hian State Football Association lam pawh inhmukhawmin AIFF dan thar tur ngaihtuahtu tur mi pasarih awmna Committee an din ve zui ta a, hetah hian Mizoram Football Association honorary secretary Lalnghinglova Hmar (Tetea Hmar) pawh a tel.

State aiawhte hi video conference hmangin AIFF Constitution thar zirhoin an inhmukhawm ṭhin a; COA chuan heng mi pasarih awmna Committee hi pawmpuiin Football House-a meeting turin May 11, Inrinni khan a ko ta a ni.

AIFF danpui ennawn
Inrinnia Football House-a ṭhukhawmte hian darkar thum leh a chanve vel zet AIFF Constitution duan chhin (draft) chu an sawiho a, State Association lamin an ngaimawh laite sawi niin COA lam pawhin an pawmpui tlangpui a ni.

Footballer hluite AIFF lama tam zawka an tel ve theih dan tura State FA lam rawtna chu ṭha tih a ni a, hmeichhe aiawh hruaitu zinga telh te, National Sports Code anga hruaitu thlanna kalpui te, sum leh pai enkawlna kawnga lang tlang zawk chungchangte leh AIFF inrelbawlna fel fai zawk a awm theihna tur sawi a ni.

Heng thute hi COA hian Supreme Court lamah a la kalpui leh ang a, pawm a nih hunah AIFF hi constitution thar angin an inthlang ang.

Inhmuhkhawmnaah hian State FA leh COA aiawhte bakah hian Supreme Court lama thubuai thehluttu Delhi Football Club aiawhin Ranjit Bajaj pawh he hunah hian a tel.

He meeting-a State Association aiawha telte chu Subrata Dutta (West Bengal), Shaji Prabhakaran (Delhi), K Satyanarayan (Karnataka) Mulrajsinh Chudasama (Gujarat) leh Lalnghinglova Hmar (Mizoram) te an ni.

FIFA leh AFC lo zin dawn
AIFF buaina ngaihtuah tur hian FIFA leh Asian Football Confederation aiawhte chu June 20-24 chhung hian an rawn zin dâwn a, FIFA hian Indian football-a mi pawimawhte leh sorkar laipui lamte a kawm dâwn a, State Association aiawhte nen pawh an inkawm ve leh dâwn a ni.

AIFF buaina hian ngaihven a hlawh chhan pakhat chu India hi kumin October-a FIFA U17 Women's World Cup thlengtu tur a ni a, AIFF hi inthlang thei loa a awm reng chuan FIFA hian a ban (pawmpuina hlihsak) mai hlauhthawnna a lian hle.

FIFA-in a ban chuan World Cup thlen theih loh piah lamah India rama football hrim hrim hi FIFA pawmpui loh vek a ni nghal ang a, ram pawna inkhelh theih loh piah lamah ISL leh I League lamah foreigner pawh an lo lut thei lo ang!

FIFA hian football inrelbawlnaa pawn lam miin thu an neih (a bikin sorkar) a phal lo a, tuna Supreme Court inrawlh dan hi a zir chiang ang a, football hmasawnna tiṭhuanawp zawng leh football federation thuneihna chhuhsak tumna a awm chuan a federation zawk hi a ban hlauh thei a ni.

Hetihlai hian tuna AIFF buainaa Supreme Court inrawlh dan hi chu hmasawnna lam hawi a nih zawk avangin FIFA-in India a ban loh rinna a lian hle a, nimahsela World Cup ṭan hma ngeia hruaitu thar a neih hman loh chuan FIFA hian COA hnuaia FIFA U17 Women's World Cup kalpui hi a duh a rinawm loh.