Vawiinah Khelo India Football Final Mizoram Vs Kerala

Khelo India Football final-ah Mizoramin vawiin chawhma dar 9:00 hian Kerala an hamchhawn dawn a, R. Lalthawmmawia hote hi champion nawn tura rinkai an ni.

Tau Devi Lal Stadium, Panchkula-ah Inrinni khan semifinal khelh a ni a, Mizoramin harsatna nei loin Karnataka 4-0 in an hneh. Champion lai tan Zothanpuia'n goal hmahruai a khung a, Laltlanzova'n goal hnih khungin Laldanmawia'n goal khat a khung ve bawk.

Semifinal hnuhnung zawkah Meghalaya leh Kerala te hun pangngaiah goal awm loin an inhnehtawk a, penalty shootout-ah Kerala 3-1 in an vannei.

Mizoram hian group stage-ah Kerala hi an hmachhawn tawh a, tun ṭum inelnaa an match hmasa berah 5-0 in an chak. Hemi a nih avang hian final-ah pawh Mizoram hi chak tura ngaih an ni.

Mahse, Mizoram manager R. Lalthawmmawia chuan, "Final chu final a ni a, a danglam ṭhin. Hneh sa a awm lo a, vanduai theih vek a ni. Inelna neihna hmun hi a lum em em a, 45C te a nih avangin ka naute an chau a, kawṭha lo leh damchiang lo thlengin an awm. Chutihrualin champion tur chuan harsatna hi a awm ve tur a ni a, chhuanlam siam kan tum lo," tiin a sawi.

Mizoram team hi SYS coach Mamawia leh Lalbulliana ten an enkawl a ni.

Thlirna Tawi
Group Stage
Mizoram 5-0 Kerala
Mizoram 3-0 Goa
Mizoram 0 - 0 Punjab

Semifinal - June 11, Inrinni
Mizoram 4-0 Karnataka
MIZ : Zothanpuia 19'; Laltlanzova 40', 67'; Laldanmawia 49'
Meghalaya 0 - 0 Kerala
Penalty Shootout-ah Kerala 3-1 in an chak

Final - Vawiin Inkhel Tur
Mizoram 9:00 AM Kerala