Rudy tan gold emaw silver

Panchkula, Haryana-a neih Khelo India Youth Games-ah Lawngtlai tleirawl Rudy Lalhmingmuani chuan final a lut a, vawiin hian Isha Gurjar, Rajasthan nen gold medal an inchuh ang. Khelo India-ah hian Mizo boxer zingah gold medal la an la awm lo a, Rudy tan mellung thar ziahna remchang a awm.

Light welterweight (60-63kg)-ah Rudy hian pre quarterfinal-ah Khushi, Haryana a hneh a, Inrinni khan quarterfinal-ah Komal Dhami, Uttarakhand a hneh leh bawk. Final lut turin Lawngtlai tleirawl hian nimin khan M Swetha, Tamil Nadu chu unanimous decision (5-0) in a hneh leh a, gold medal la thei dinhmunah a ding.

Mizoram manager R. Lalbiaksangi chuan, "Khaw lum vanga harsatna karah Rudy-i'n final a thleng hi kan lawm a, gold medal a lak theih nan Mizo mipuite ṭawngṭaipuina kan ngen," tiin Vanglaini a hrilh a, Mizo hming ṭhat nan theihtawp an chhuah thu a sawi bawk.

Mizo mipa boxer Zorammuana (Tuipui), Franky Vanlalruatpuia (Lunglei) leh Lalnunzira (Lunglei) ten pre quarterfinal an paltlang lo. Hmeichhe boxer Ruthi Lalhmingṭhai (Reiek) leh Naom Chinsangnuam (Chaltlang) te bakah Mipa boxer Laldinsanga (54 kg) leh Vanlalhuala (80 kg) ten quarterfinal thleng mah se semifinal an thleng thei ta lo.

Mizoram boxing team hi SYS coach pahnih R. Labiaksangi (manager) leh Lalfakzuala (coach) ten an hruai a ni.