Curry hoin Golden State an chak
NBA Finals a hmuhnawm, team thawhhona ṭha pahnihin inkhel hmuhnawm an chhawp chhuah ṭhin avangin Thawhlehni zing dar 6:80-a game 5 an khelh tur pawh a hmuhnawm ang.
Inrinni zing khan TD Garden-ah game 4 khelh niin, player ṭha bik Stephen Curry-a point 43 hmangin Golden State Warriors chuan Boston Celtics lakah 107-97 in hnehna an chang.
Best of seven series-ah team pahnih hi 2-2 in an inhnehtawk mek, champion tur chuan a tlem berah vawi li tal chak an ngai; khualmualah vawi khat ve ve hnehna an chang tawh, mahni mual loah pawh an hlauhawm tih a chiang.
A changtupa Curry
Hun tawp hma minute nga chauh awm tawhah, mualneitu Boston lamin 94-90 in hma an hruai, chak tlang ni se chuan 3-1 in series-ah hman an hruai thei dawn.
Mahse, hun pawimawh laiah Curry a inlar. GSW lamin a zawnin basket an nei chho - hla deuh tak aṭanga Curry-a'n 3 points a neih hmangain an umphak a, a hnuah Klay Thompson nen an khung belh bawk.
American point guard Curry chuan, "Ka mimal khelh dan a pawimawh lo, kan team kan chak em tih hi a pawimawh zawk chu a ni," tiin a sawi a, game 3 an khelh ṭuma a ke rek hliam chuan a rilru luah deuh mah se harsatna lian tham a thlensak lo.
Curry hian tun NBA Finals-ah hian chawhrualin match khatah point 34.3 nei zel ang a ni a, 3 points neih tuma vawi 51 a vawm zinga 25 zet a hlawhtling, player naran tana tih theih a ni lo.
Point 18 neitu Thompson chuan, "Steph hian hun harsaah min lo hruai chhuak tawh thin, nuamti taka a inkhel lai hi chu hmuhnawm thlira lo thlir mai hi a awl. Game 5-ah pawh a khelhṭhat kan beisei," a ti. Curry leh Thompson te bakah point 17 a neih baka rebound vawi 16 latu Andrew Wiggins a khel tha hle.
Celtics an nep lo
Chak thei dinhmunah an ding reng a, team pahnih inhnehtawk taka an in nawr tawn zak zak lai pawhin hma an hruai fo - a tawpah erawh an vanduai chauh mai zawk a ni.
Boston Celtics tana point 23 neitu Jayson Tatum chuan, "Golden State Warriors khan fak an phu, an point neih dan tam tak kha a turu hle. Kan dinhmun kha a tha hma viau a, amaherawh chu team ṭha lakah chuan second tlemte chauh chet fuh loh pawh a pawi thui ṭhin," a ti.
Kum 24 mi Tatum hian rebound vawi 11 a la bawk a, team tan a ṭangkai - a puitling takzet tawh em tih chu Chase Centre-a game 5 an khelh hunah fiahin a awm leh ang.
Jaylen Brown (21points), Marcus Smart (18) leh Derrick White (16) te pawh an khel ṭha vek, an vanneih ṭum nise chak pui tham an ni; chak loh hlaua khel Warriors hneh nan erawh a tawk zo lo.
Boston Celtics hian NBA title vawi 17 an la tawh, record nei ṭha ber niin Los Angeles Lakers nen an champion zat a inang - kuminah an champion thei a nih chuan Lakers kalsanin an sang fal ang.
NBA Finals
Results & Fixtures
Game 1: Golden State 108 - 120 Boston Celtics
Game 2: Golden State 107 - 88 Boston Celtics
Game 3: Boston Celtics 116 - 100 Golden State
Game 4: Boston Celtics 97 - 107 Golden State
June 14, Thawhlehni
Game 5: Golden State 06:30 AM Boston Celtics
June 17, Zirtawpni
Game 6: Boston Celtics 06:30 AM Golden State
June 20, Thawhṭanni
Game 7: Golden State 06:30 AM Boston Celtics
(Series-ah team pahnih 2-2 in an inhnehtawk mek)