Real-in Tchouameni an la lut ta

European champion Real Madrid chuan AS Monaco midfielder Aurelien Tchouameni an lakluh thu an puang a, a man atan hian pound maktaduai 85 bawr vel an inseng niin khawthlang media chuan an tarlang.

Tchouameni hi a tirah chuan Liverpool, Manchester United leh Paris St-Germain nen pawh sawi zawm a ni a, a bik takin Reds hi zawm mai a hnial lo nia sawi a ni hman.

Mahse, Real-in an beisei anga Kylian Mbappe an lakluh theih loh hnuah Tchouameni hi lakluh ngei tumin an dawr zui a, a hlawh phut ang zat pawh pek an inhuam vek avangin an chang ta zawk.

Bordeaux aṭanga inzir chhuak midfielder hi Real-in player an lakluh zinga man to palina a ni a, Gareth Bale, Cristiano Ronaldo leh Eden Hazard te man a phak lo. Real hian nipui transfer-ah Chelsea aṭangin Antonio Rüdiger chu free transfer-in an lalut tawh bawk - transfer bazar-ah hun an hmang ṭha rih hle.

Sum a tam
Real Madrid chuan Aurelien Tchouameni manah hian pound maktaduai 68.3 an pet phawt nia sawi a ni a, a bak pound maktaduai 17 chu a khelh ṭhat dan a zira la pek leh tur a ni ang.

French defensive midfielder hian kar khatah £150,000 a hlawh dawn nia sawi a ni a, tlarhnung ven kawnga a ṭangkai tluk zetin goal nawr kawngah pawh a thawhhlawk ṭhin hle.

May thla chawhnu lam kha chuan Tchouameni hian Liverpool lam a awn a, Real nen a be kawp ve ve - Madrid khaw club hian Mbappe lakluh nan sum insen hnem an tum avangin Tchouameni hi a hlawh phut zat pek an inhuam lo.

Hetiang boruak karah hian United leh PSG hnartu midfielder hian Anfield panin a puanthuah a tel mai dawn niin a lang hman a, mahse, Real-in Mbappe an lakluh theih loh takah chuan player dang tan sum an ren lo thar a, Tchouameni an lakluh theih phah.

Tu nge Tchouameni?
Kum 22 mi defensive midfielder hi French club Bordeaux aṭanga inzir chhuak a ni a, July 2018 khan a professional career-a a match hmasa ber a khel - Bordeaux-ah season khat leh a chanve a khelh hnuin Monaco a pan.

Monaco-a a season hmasa berah a inkhel tam tawk lo. Mahse, 2020-21 season khan a theihna tak tak hmuh turin a awm ṭan - inelna hrang hrangah match 43 khelin goal thum a khung a, Ligue 1 young player of the year-ah thlan a ni bawk.

Chu chauh a ni lo - Ligue 1 team of the year-ah thlan a ni bawk. Season hman zawh takah khan Monaco tan match 50 khelin goal nga a khung a, goal nga khungin assist vawi thum a nei.

Ligue 1 team of the year-ah season hnih nan a lang leh a, September 1, 2021 khan France tan a match hmasa ber a khel ve chauh a, Real a pan meuh chuan France tan pawh match 11 khelin goal khat a khung tawh.