Australia vs Peru - Tu nge Qatar pan zawk dawn?

Thlasikah World Cup khelh a ni dawn a, khawmualpui hrang hrang aṭanga World Cup khel tur a chiang chho a, inter-confederation playoff hmanga hmun ruak chinfel chiah hmabak a awm ta - zanin dar 11:30-ah Australia leh Peru an inkhel dawn.

Inter-confederation playoff hi single leg-a khelh tur a nih avangin ram pahnih tan zanin inkhel tur hi final tia sawi theih a ni a, World Cup thlengtu tur Qatar-a khawpui pakhat Al Rayyan-ah khelh a ni ang.

Australia hian playoff khel turin United Arab Emirates chu 2-1 in an hneh a, an phur vanglai tak a ni - friendly match-a New Zealand hneh hlim Peru tan hna a awlsam dawn lo tih a chiang.

Australia dinhmun
Graeme Arnold enkawlna hnuaia khel Australia-in Mark Viduka, Harry Kewell leh Tim Cahill te hunlai angin player ṭha sawi vul chuk tur an nei hran lo a, mahse, team discipline leh thawhhona ṭha chu an hmachhuan a ni.

Arnold-a'n 4-1-3-2 formation hmangin fimkhur takin a team a rawn rem tura ngaih a ni a, tlarhmaah Europa League champion Eintracht Frankfurt attacking midfielder Ajdin Hrustic hi ven bik a sual lo ang.

Defensive midfield-ah Peru goal nawr na tak chhu chat turin Aaron Mooy a din a ngai dawn a, Shanghai Port midfielder hi Premier League-a Huddersfield Town leh Brighton & Hove Albion tana lo khel tawh a ni a, ngaihtuahawm lo tura ngaih a ni.

Peru ve hi?
'El Tigre' tia hming lem an pek, Peru coach Ricardo Gareca hian 4-3-3 emaw 4-2-3-1emaw chu a formation hman ṭhin dan a ni a, ṭum dang ang thoin possession chu thupui berah neiin, a awng an hmuh laiah na takin an nawr ang.

Peru squad-a player-te hi kum ruk vel lo khel ho tawh sa an nih avangin an inman a, an inhrechiang bawk - hei hi an chakna pakhat a ni a, Al-Fateh attacking midfielder Christian Cueva thiamzia inhrilh nawn a ngai lo bawk.

Kum 30 mi winger André Carrillo hi Sporting Lisbon, Benfica leh Watford tana lo khel tawh a ni a, AC Milan striker hlui Gianluca Lapadula pawh a rintlak leh fu ang - goalkeeper Pedro Gallese hi ram tana vawi 90 inlan tawh a ni a, World Cup playoff-a zam tur niin a lang lo.