India tan Asian Cup a hnai

AFC Asian Cup 2023 khel turin India dinhmun a ṭha zel - Blue Tigers hian Inrinni zan khan Asian Cup qualifier-ah Afghanistan chu 2-1 in an hneh a, match hnih an khelh tawha an la chak ve ve avangin Asian Cup khelh phak chance a sang ta hle.

India tan Sunil Chhetri chuan penalty aṭangin goal hmahruai a khung a, Sahal Abdul Samad chuan a belhchhah bawk - Afghanistan tana Zubayr Amiri goal khung chu scoreline timawitu chauh a chang. Inkhelh zawhah buaina tenau chhuak mah se pawi erawh a thleng thui hman lo.

Blue Tigers hian June 14, Thawhlehni zan dar 8:30-ah Hong Kong an hmachhawn zui dawn a, chak emaw draw result pawhin an tlang tawh tura ngaih a ni - chak ngei erawh an duh dawn.

Hong Kong hian Inrinni zan khan Cambodia chu 3-0 in an sawp a, match hnih an khelh aṭangin anni pawhin point ruk an nei mek - India nen point hmuh zat a inang.

An inngam
Salt Lake Stadium, Kolkata-a team pahnih intawn hma aṭangin boruak a lian a, inkhel ṭantir aṭangin team pahnih hi inhlau lo takin an innawr tawn - a bik takin match hmasa bera chak lo Afghanistan tan beiseina nei turin chak ngei ngei a ngai.

Minute 15-na lekah Jeakson Singh chuan chance duhawm nei mah se Manipur midfielder hian goal-ah a chantir thei lo. Sunil Chhetri pawhin chance duhawm a nei a, mahse, Bengaluru striker hian goal-ah a chantir thei lo.

Goal lut loa chawlhlawk hman a nih hnuah pawh India-in chance duhawm an nei hmasa zawk a, mahse, Chhetri chuan goal khung turin hun duhawm nei mah se engmah lo maiah a chantir thung.

Minute 62-naah Afghanistan hun a inher chhuak a, mahse, mahse, Polish top division club Lechia Gdansk forward Omran Haydary chuan hnai set sawt aṭangin a tauh goal tlat lo.

Chhetri bawk chu
India tan lung lam harsatna a neih avanga inkhel thei tawh lo ang hiala sawi hlawh hman, season hman zawh tak ISL-a FC Goa tana rawn kir Anwar Ali chuan chance duhawm a nei ve a, mahse, ram tana a goal hmasa ber a khung thei bik lo.

Hun tawp a hnai a, goal lut loa team pahnih an ṭin mai dawna a lan hnuah India tan Chhetri bawk a inlar a, Ashique Kuruniyan-a penalty hlawhchhuah chu kum 37 mi striker hian minute 86-naah goal-ah a chantir a, 1-0 a ni.

Mahse, Afghanistan-in kut ruaka haw an duh lo - kum 32 mi, German fourth division club SC Hessen Dreieich tana khel Zubayr Amiri chuan hun tawp nan minute hnih chiah a awm tawh tihah si phurh a rawn sut.

Kolkata khawpuia fans 44,216 hmaah India an chak zo dawn lo niin a lang hman. Mahse, Blue Tigers hian ngaihdan dang an nei - mawi zeta ball an inpek kual hnuah Samad chuan goal khung lehin India tan a hmawr a bawk a, chakna goal a khung hian hun pek belh minute khatna a ni!

India beiseina
Blue Tigers-in hnehna an chan avangin point ruk an hmu a, Afghanistan erawh an tlawm avangin beisei tur an nei tawh lo. Hetihlai hian Cambodia pawh Hong Kong lakah an tlawm a, vawi hnih an tlawm tawh avangin Asian Cup khelh beiseina a bo tawh.

India leh Hong Kong hi la inkhel dawn mah se team pahnih an tlak tawh avangin, table-ah pahnihna aia hniam chu an ni tawh dawn lo ve ve tihna a ni a, Asian Cup a chiang tawh ang thawthangin a sawi theih.

AFC Asian Cup qualification third round-ah hian team 24 an inel a, group khata team pali zel awmin group parukah ṭhen hran an ni - group hmahruaitu ṭheuh leh pahnihna zinga a ti ṭha zual panga chu Asian Cup khel turin an tling ang.

India leh Hong Kong hian point ruk ve ve an nei a, goal difference-a ṭha zawk Hong Kong hian hma an hruai mek. Team pahnih hi an match tawp berah intawng dawn mah se, an point hmuh sa ringawt hi Asian Cup thlenpui turin a ṭhat tawk a rinawm.